ବୌଦ୍ଧ,୩/୧ – ଗତ ବୁଧବାର ରାତିରୁ ନିଖୋଜ ଥିବା ବୌଦ୍ଧ ସହର ରାଜନ୍ପାଲି ଗ୍ରାମର ଅଗସ୍ତି ମହାକୁଡ (୪୯)ଙ୍କ ଶବକୁ ଆଜି ସକାଳେ ବୌଦ୍ଧ ଆଦର୍ଶ ଥାନା ପୋଲିସ ଉଦ୍ଧାର କରିଛି । ବାପୁଜୀ ନଗର ଓ ନୂଆସାହି ମଧ୍ୟରେ ଥିବା ବିଲ ଭିତରେ ଗୃହ ନିର୍ମାଣ ପାଇଁ ରଖା ଯାଇଥିବା ବାଲିଗଦା ମଧ୍ୟରୁ ଶବ ଉଦ୍ଧାର ହୋଇଥିବା ଜଣା ପଡିଛି । ଶବକୁ ବାଲିଗଦା ଭିତରୁ କୁକୁରମାନେ ଟଣାଓଟରା କରିବା ପରେ ଶବର ଅଣ୍ଟାରୁ ଗୋଡ ପର୍ଯ୍ୟନ୍ତ ବାହାରକୁ ଦୃଶ୍ୟ ହୋଇଥିଲା । ଏ ସମ୍ପର୍କରେ ପୋଲିସକୁ ସୁଚନା ମିଳିବା ପରେ ବୌଦ୍ଧ ଆଦର୍ଶ ଥାନା ଅଧିକାରୀ ସୁଶ୍ରୀ ତପସ୍ୱିନୀ କହଁର ସଦଳବଳେ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ପାରିପାର୍ଶ୍ୱିକ ଅବସ୍ଥାକୁ ନିରୀକ୍ଷଣ କରିଥିଲେ । ଶବକୁ ମୃତକଙ୍କ ପୁଅ ଚିହ୍ନଟ କରିଥିଲେ ଓ ପୋଷ୍ଟମର୍ଟମ ପାଇଁ ବୌଦ୍ଧଜିଲ୍ଲା ଡାକ୍ତରଖାନା ପଠାଯାଇଥିଲା । ପରିବାର ପକ୍ଷରୁ ସୂଚନା ଅନୁଯାୟୀ ଗତ ବୁଧବାର ସନ୍ଧ୍ୟାରେ ରାଜନପାଲି ନିଜ ଘରୁ ଅଗସ୍ତି ବୁଲାବୁଲି କରିବାକୁ ବାହାରିଥିଲେ । ସେ ବିଳମ୍ବିତ ରାତି ଯାଏଁ ଘରକୁ ନ ଫେରିବାରୁ ଘର ଲୋକେ ସାଙ୍ଗ ସାଥୀ ଓ ବନ୍ଧୁ ବାନ୍ଧବ ଘରକୁ ଫୋନ୍ କରି ଅଗସ୍ତି ସମ୍ପର୍କରେ କୌଣସି ସୂଚନା ପାଇନଥିଲେ । ଗୁରୁବାର ଦିନ ସାରା ମଧ୍ୟ ସେ ଘରକୁ ନ ଫେରିବାରୁ କିମ୍ବା କୌଣସି ପତ୍ତା ନ ମିଳିବାରୁ ତାଙ୍କର ପତ୍ନୀ ଶାନ୍ତିଲତା ମହାକୁଡ ବୌଦ୍ଧ ଆଦର୍ଶ ଥାନାରେ ସ୍ୱାମୀଙ୍କ ନିଖୋଜ ନେଇ ଲିଖିତ ଅଭିଯୋଗ କରିଥିଲେ । ଅଗସ୍ତି ନିଖୋଜ ଦିନ ସନ୍ଧ୍ୟାରେ ଏକାଠି ବୁଲାବୁଲି କରୁଥିବା ଜଣେ ଯୁବକଙ୍କୁ ପୋଲିସ୍ ଡାକି ପଚରା ଉଚୁରା କରିଥିଲା । ମୃତଦେହର ଛାତି ଓ ମୁହଁରେ ଆଘାତ ଲାଗିଥିବା ଦେଖିବାକୁ ମିଳିଛି । ତେଣୁ କେହି ହତ୍ୟା କଲା ପରେ ଶବକୁ ବାଲି ଗଦାରେ ପୋତି ଦେଇଥିବା ସନ୍ଦେହ କରାଯାଉଛି । ପୋଲିସ୍ ଏକ ହତ୍ୟା ମାମଲା ରୁଜୁ କରି ଘଟଣାର ତଦନ୍ତ କରୁଥିବା ଜଣାପଡିଛି । ପୋଲିସ୍ ତଦନ୍ତ ଓ ପୋଷ୍ଟମର୍ଟମ ରିପୋର୍ଟ ଆସିବା ପରେ ହତ୍ୟାକାଣ୍ଡର କାରଣ ଓ ଅଭିଯୁକ୍ତ କିଏ ଜଣା ପଡିବ ବୋଲି ଆଶା କରାଯାଉଛି ।