ବୌଦ୍ଧ,୧/୧୦: ଗତକାଲି ରାତିରେ ଏକ ଅଜଣା ଗାଡି ଧକ୍କାରେ ଜଣେ ବାଇକ ଆରୋହୀଙ୍କ ମୃତ୍ୟୁ ଘଟିଛି । ପ୍ରାପ୍ତ ଖବରରୁ ପ୍ରକାଶ ଯେ ଆଜି ସକାଳେ ମୁର୍ଷୁଣ୍ଢି ପଞ୍ଚାୟତ ତେତେଲେଙ୍ଗା ଗ୍ରାମ ମଠ ମନ୍ଦିର ନିକଟରେ ଜଣେ ବ୍ୟକ୍ତିଙ୍କ ମୃତ ଦେହ ପଡିଥିବା ଦେଖିବାକୁ ମିଳିଥିଲା । ମୃତ ଦେହ ନିକଟରେ ଏକ ବାଇକ ଓଡି୨୭ସି୦୦୬୦ ପଡିଥିଲା । ସ୍ଥାନୀୟ ଲୋକେ ପୁଲିସକୁ ସୂଚନା ଦେବାପରେ ଘଟଣାସ୍ଥଳରେ ପୁଲିସ ପହଞ୍ଚି ଶବକୁ ଜବତ କରି ତଦନ୍ତ କରିଥିଲେ । ମୃତ ବ୍ୟକ୍ତି ଜଣକ ବୌଦ୍ଧବ୍ଲକ ମୁଣ୍ଡିପଦର ଗ୍ରାମର ହେମନ୍ତ ମେହେର (୩୫) ବୋଲି ଜଣାପଡିଛି । ସେ ତାଙ୍କ ଶଶୁର ଘର ବାଘପାଲିକୁ ଯାଇ ଗତକାଲି ରାତିରେ ଫେରୁଥିବାବେଳେ ଅଜଣା ଗାଡି ଧକ୍କା କରିଥିବା ଅନୁମାନ କରାଯାଉଛି । ଖବରପାଇ ପରିବାର ଲୋକେ ପହଞ୍ଚିବା ପରେ ଶବ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ପୁଲିସ ସୁତ୍ରରୁ ପ୍ରକାଶ ।