ବୌଦ୍ଧ,୭/୮ – କଣ୍ଟାମାଳ ବ୍ଲକ ଗରିଆପାଲି ଗାଁରେ ଅଘଟଣ । ଗତକାଲିର ପ୍ରବଳ ବର୍ଷାରେ ଘରର କାନ୍ଥ ଭୁଶୁଡି ପଡିବାରୁ ଗୋଟିଏ ପରିବାରର ଦୁଇ ଜଣ ଆହତ ହୋଇଛନ୍ତି । ଆହତ ଦୁଇ ଜଣ ହେଲେ ଗାଁର ପ୍ରଦୀପ ଗରିଆ ଓ ତାଙ୍କ ପୁଅ । ଗତ ରାତିରେ ଘରେ ଶୋଇଥିବା ବେଳେ ବର୍ଷା ଯୋଗୁଁ ଘରର ମାଟି କାନ୍ଥ ଭାଙ୍ଗିଯାଇଥିଲା । ଏହି ସମୟରେ ଘରେ ପ୍ରଦୀପ, ତାଙ୍କ ସ୍ତ୍ରୀ ପଦ୍ମାଳୟା ଓ ଦୁଇ ସନ୍ତାନ ଶୋଇଥିଲେ । ତାଙ୍କ ଉପରେ କାନ୍ଥ ଭୁଶୁଡି ପଡିବା ପରେ ପାଟିତୁଣ୍ଡ ଶୁଣି ପଡୋଶୀମାନେ ଆସି ଉଦ୍ଧାର କରିଥିଲେ । ପ୍ରଦୀପ ଓ ତାଂକର ଗୋଟିଏ ପୁଅ ସାମାନ୍ୟ ଆହତ ହୋଇଥିବା ବେଳେ ଅନ୍ୟମାନେ ଅଳ୍ପକେ ବର୍ତ୍ତିଯାଇଥିବା ସୂଚନା ମିଳିଛି । ଅନ୍ୟପଟେ କ୍ଷତିଗ୍ରସ୍ତ ପରିବାରଙ୍କୁ କୌଣସି ପ୍ରକାର ସରକାରୀ ସହାୟତା ମିଳିପାରିନାହିଁ । ଗୋଟିଏ ଗରିବ ପରିବାରର ହୋଇଥିବାରୁ ତାଙ୍କୁ ତୁରନ୍ତ ସହାୟତା ଯୋଗାଇ ଦେବାକୁ ଗ୍ରାମବାସୀ ଅନୁରୋଧ କରିଛନ୍ତି ।