ବୌଦ୍ଧ,୯/୭ – ବୌଦ୍ଧଜିଲ୍ଲା ହରଭଙ୍ଗା ବ୍ଲକ୍ ପୁରୁଣାକଟକ ଥାନା ତିଲେଶ୍ୱର ଗ୍ରାମରେ ବିଲ ମଧ୍ୟରେ ଥିବା ପାଣିରୁ ଜଣେ ଚାଷୀଙ୍କ ମୃତଦେହ ଉଦ୍ଧାର କରାଯାଇଛି । ମିଳିଥିବା ସୂଚନା ଅନୁଯାୟୀ ତିଲେଶ୍ୱର ଗ୍ରାମର ନରେନ୍ଦ୍ର ଡାଙ୍ଗ ନାମକ ଜଣେ ଚାଷୀ ସବୁଦିନ ପରି ଆଜି ସକାଳେ ମଧ୍ୟ ନିଜ ଜମିକୁ କାମ କରିବାକୁ ଯାଇଥିଲେ । ସେ ପ୍ରତିଦିନ ସକାଳ ୯ ଘଣ୍ଟା ସୁଦ୍ଧା ନିଜ ଘରକୁ ଫେରି ଆସୁଥିବାବେଳେ ଆଜି ଡେରି ହେବାରୁ ତାଙ୍କର ସ୍ତ୍ରୀ ବିଲକୁ ଖୋଜିବାକୁ ଯାଇଥିଲେ । ଗୋଟିଏ ବିଲରେ ଜମି ରହିଥିବା ବର୍ଷା ଜଳ ମଧ୍ୟରେ ନରେନ୍ଦ୍ରଙ୍କ ଶରୀର ଭାସୁଥିବା ଦେଖି ଲୋକମାନଙ୍କୁ ଡାକ ପକାଇଥିଲେ । ପାଣିରୁ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କଲାପରେ ସେ ମୃତ୍ୟୁବରଣ କରିଥିବା ଜଣାପଡିଥିଲା । ଏ ସମ୍ପର୍କରେ ପୁରୁଣାକଟକ ପୋଲିସକୁ ଖବର ଦିଆଯିବା ପରେ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ପୋଲିସର ତଦନ୍ତ ପରେ ଏହା ଆତ୍ମହତ୍ୟା କି ହତ୍ୟା ନା ଦୁର୍ଘଟଣା ତାହା ଜଣାପଡିବ ।