ବୌଦ୍ଧ,୮/୧- ବୌଦ୍ଧଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ତିଲେଶ୍ୱର ପଞ୍ଚାୟତ ବୁରୁବୁଡା ଗ୍ରାମ ନିକଟରେ ଗୁରୁବାର ରାତି ପ୍ରାୟ ସାଢେ ୯ଟା ସମୟରେ ବାଇକ ଦୁର୍ଘଟଣା ଘଟି ଦୁଇଜଣ ଯୁବକ ଗୁରୁତର ଭାବେ ଆହତ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ତିଲେଶ୍ୱର ପଞ୍ଚାୟତ ଘିମୁହାଣୀ ଗ୍ରାମର ଅଜିତ ଭୋଇ(୨୧)ଓ ସୁବ୍ରତ ଦେହୁରୀ(୧୭) କୌଣସି କାମରେ ପୁରୁଣାକଟକ ଆସି ଏକ ବାଇକ ଯୋଗେ ଘରକୁ ଫେରୁଥିଲେ । ପୁରୁଣାକଟକ – ଧଳପୁର୍ ରାସ୍ତାର ବୁରୁବୁଡା ନିକଟରେ ବାଇକଟି ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହୋଇଥିଲା । ଉଭୟ ବାଇକ ଆରୋହୀ ଗୁରୁତର ଆହତ ହୋଇଥିଲେ । ଖବରପାଇ ଚାରିଛକ ସ୍ଥିତ ହରଭଙ୍ଗା ଦମକଳବାହିନୀର କର୍ମଚାରୀମାନେ ଘଟଣା ସ୍ଥଳରୁ ସେମାନଙ୍କୁ ଉଦ୍ଧାର କରି ପୁରୁଣାକଟକ ଡାକ୍ତରଖାନାରେ ଭର୍ତ୍ତି କରିଥିଲେ । ଉଭୟଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି । ପୁରୁଣାକଟକ ପୋଲିସ ସେଠାରେ ପହଞ୍ଚି ତଦନ୍ତ ଆରମ୍ଭ କରିଥିଲା ।