ଚମ୍ପୁଆ: ଚମ୍ପୁଆ ଥାନା ଅନ୍ତର୍ଗତ ପାଂଚପୋଖରିଆଠାରେ ଗତ ବୁଧବାର ଦିନ ଏକ ୪ ବର୍ଷର କନ୍ୟା ଶିଶୁକୁ ଧରି ଜଣେ ଅଜଣା ବ୍ୟକ୍ତି ଫେରାର ହୋଇଯାଇଥିବା ଶିଶୁ କନ୍ୟାର ଜେଜେମା ଚମ୍ପୁଆ ଥାନାରେ ଅଭିଯୋଗ କରିଛନ୍ତି । ଘଟଣା ଅନୁସାରେ ପାଂଚପୋଖରିଆ ଗ୍ରାମ ନିକଟ ଶିରପୁରରେ କିଛି ଦିନ ହେବ ଆସି ରହୁଥିବା ଅଜଣା ଯୁବକ ଜଣକ ଲକ୍ଷ୍ମଣ ନାଏକ ସହ ସମ୍ପର୍କ ଯୋଡିଥିଲେ । ଏପରିକି ଅନେକ ସମୟରେ ମିଳିତ ଭାବେ ଉଭୟ କାମ ଧନ୍ଦା ମଧ୍ୟ କରୁଥିଲେ । ମାତ୍ର ଗତକାଲି ଶିରପୁର ଛକଠାରେ ଥିବା ହାଣ୍ଡିଆ ଭାଟିରେ ଉଭୟ ହାଣ୍ଡିଆ ପିଇ ସାରିବା ପରେ ଲକ୍ଷ୍ମଣ ନାଏକ ଚମ୍ପୁଆ ପଳାଇ ଯିବାର ସୁଯୋଗ ନେଇ ଅଜଣା ବ୍ୟକ୍ତି ଜଣକ ୪ ବର୍ଷର ଶିଶୁକନ୍ୟାକୁ କିଛି ଖାଦ୍ୟ କିଣି ଦେବାକୁ କହି ସେଠାରୁ ନେଇ ପଳାଇଯାଇଥିଲା । ଘର ଲୋକ ଅନେକ ସମୟ ଅପେକ୍ଷା କରିବା ପରେ ମଧ୍ୟ ଉକ୍ତ ବ୍ୟକ୍ତି ଜଣକ ନଫେରିବାରୁ ସ୍ଥାନୀୟ ଲୋକଙ୍କ ସହ ମିଶି ପରିବାରର ସଦସ୍ୟମାନେ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ ଶିଶୁ କିମ୍ବା ସେ ବ୍ୟକ୍ତିର ସନ୍ଧାନ ମିଳିପାରିନଥିଲା । ଫଳରେ ଘର ଲୋକ ଏ ନେଇ ଚମ୍ପୁଆ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ କେସ ନଂ-୧୧୦/୨୩ ରୁଜୁ କରି ବିଭିନ୍ନ ସ୍ଥାନରେ ଛାପା ମାରିଥିବା ଜଣାଯାଇଛି । ଏପରିକି ସୋଶିଆଲ ମିଡିଆରେ ମଧ୍ୟ ଏହି ୪ ବର୍ଷର ଶିଶୁ କନ୍ୟା ସମନ୍ଧରେ ସୂଚନା ପ୍ରଦାନ କରାଯାଇ ବିଭିନ୍ନ ସ୍ଥାନରେ ଅନୁସନ୍ଧାନ ଜାରି ରହିଛି ।