ଦାରିଙ୍ଗବାଡି,୨୩/୮: ଦାରିଙ୍ଗବାଡି ବ୍ଲକ ସିମନବାଡି ଗୋଷ୍ଠୀ ଖେଳପଡିଆ ଠାରେ ଚାଲିଥିବା ଜିଲ୍ଲା ସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟର ପଞ୍ଚମ ଦିନରେ ଅନୁଷ୍ଠିତ ଗ୍ରୁପ-ଏ ର ପ୍ରଥମ କ୍ୱାଟର ଫାଇନାଲ ମ୍ୟାଚ ମା ମଙ୍ଗଳା କ୍ଲବ କ.ନୂଆଗାଁ ଏବଂ ଡଙ୍ଗରପଡ଼ା ଦଳ ମଧ୍ୟରେ ଅନୁଷ୍ଠିତ ହୋଇଥିଲା । ଏହି ରୋମାଞ୍ଚକର ମ୍ୟାଚର ନିର୍ଦ୍ଧାରିତ ସମୟ ମଧ୍ୟରେ ମା ମଙ୍ଗଳା କ୍ଲବ କ.ନୂଆଗାଁ ଦଳ ଗୋଟିଏ ମଧ୍ୟ ଗୋଲ ସ୍କୋର କରିପାରିନଥିବାବେଳେ ଡଙ୍ଗରପଡ଼ା ଦଳ ୨ ଗୋଲ ଦେଇ ୨-୦ ବ୍ୟବଧାନରେ ହରାଇ ବିଜୟୀ ହୋଇ ଗ୍ରୁପ-ଏ ର ପ୍ରଥମ ଦଳ ଭାବେ ସେମିଫାଇନାଲରେ ପ୍ରବେଶ କରିଛି । ଡଙ୍ଗରପଡ଼ା ଦଳ ତରଫରୁ ମ୍ୟାଚର ଶ୍ରେଷ୍ଠ ଖେଳାଳୀ ଏବଂ ଶ୍ରେଷ୍ଠ ପାସର ବିଜୟ କୁମାର ଏକାକୀ ୨ଟି ଯାକ ଗୋଲ ଦେଇ ଦଳକୁ ବିଜୟୀ କରିବାରେ ମୁଖ୍ୟ ଭୂମିକା ରହିଥିଲା । ସେହିପରି ଅପରାହ୍ନ ସମୟରେ ଗ୍ରୁପ-ବିର ପ୍ରଥମ କ୍ୱାଟର ଫାଇନାଲ ମ୍ୟାଚ ଗହିଙ୍ଗିଆ ଏବଂ ଗସୁକିଆ ଦଳ ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ଗହିଙ୍ଗିଆ ଦଳ ଗସୁକିଆ ଦଳକୁ ୧-୦ଗୋଲରେ ହରାଇ ଗ୍ରୁପ-ବିର ପ୍ରଥମ ଦଳ ଭାବେ ସେମିଫାଇନାଲରେ ପ୍ରବେଶ କରିଛି । ଯାହାଫଳରେ ଆସନ୍ତା ୨୬ତାରିଖରେ ଅନୁଷ୍ଠିତ ହେବାକୁ ଥିବା ପ୍ରଥମ ସେମିଫାଇନାଲ ମ୍ୟାଚ ଡଙ୍ଗରପଡ଼ା ଏବଂ ଗହିଙ୍ଗିଆ ଦଳ ମଧ୍ୟର ଅନୁଷ୍ଠିତ ହେବ । ଏନେଇ ଆୟୋଜକ କମିଟି ତରଫରୁ ସୂଚନା ଦିଆଯାଇଛି । ଏହି ଟୁର୍ଣ୍ଣାମେଣ୍ଟକୁ ଆୟୋଜକ କମିଟି ସଦସ୍ୟ ଜଗନ୍ନାଥ ନାୟକ, ପ୍ରଭାସ ସାହୁ, ଅମର ନାୟକ(ତୋଫାନ),ମାଥ୍ୟାସ ପ୍ରଧାନ, ହୃଷୀକେଶ ବେହେରା ପ୍ରମୁଖ ସହଯୋଗ କରିଥିଲେ ।