ଦଶପଲ୍ଲା,୧୭/୬:- ନୟାଗଡ ଜିଲ୍ଲା ଦଶପଲ୍ଲା ବ୍ଲକ ବାଣିଗୋଛା ଥାନା ଅନ୍ତର୍ଗତ ଧୁନ୍ଦୁଗାଡିଆ ଗ୍ରାମର ଶିଶୁ କନ୍ୟା ‘ବେବି’ ନିଖୋଜ ଘଟଣାର ପର୍ଦ୍ଦାଫାଶ କରିଛି ପୋଲିସ । ଘଟଣାର ୫ମ ଦିନରେ ପୋଲିସକୁ ମିଳିଛି ସଫଳତା । ପୋଲିସ ‘ ବେବି ‘ର ମୃତ ଗଳିତ ଶବକୁ ଉଦ୍ଧାର କରିଥିବା ବେଳେ ଘଟଣାରେ ସମ୍ପୃକ୍ତ ଅଭିଯୁକ୍ତକୁ ଗିରଫ କରିଛି । ଗିରଫ ଅଭିଯୁକ୍ତ ସେହି ଗ୍ରାମର ସାଗର ଦଳେଇ ବୋଲି ପୋଲିସ ଠାରୁ ସୁଚନା ମିଳିଛି । ବେବିକୁ ଦୁଷ୍କର୍ମ ପରେ ହତ୍ୟା କରାଯାଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ପ୍ରକାଶ ଯୋଗ୍ୟ ଯେ , ଚଳିତ ମାସ ୧୨ ତାରିଖ ଦିନ ମଧ୍ୟାହ୍ନ ସମୟରେ ଧୁନ୍ଦୁଗାଡିଆ ଗ୍ରାମର କୁନା ନାୟକଙ୍କ ୬ ବର୍ଷ ର ଶିଶୁ କନ୍ୟା ବେବି ଗାଁ ଦାଣ୍ଡରେ ଖେଳୁଥିବା ବେଳେ ନିଖୋଜ ହୋଇ ଯାଇଥିଲା । ଘରକୁ ନ ଫେରିବାରୁ ବେବିର ପିତାମାତା ବହୁ ଖୋଜାଖୋଜି କରିଥିଲେ ମଧ୍ୟ ବେବିକୁ ପାଇନଥିଲେ । ପରେ ବେବିର ପିତା କୁନା ନାୟକ ବଣିଗୋଛା ଥାନାରେ ଅଭିଯୋଗ କରିବାପରେ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଥିଲା । ସାଇଣ୍ଟିଫିକ୍ ଟିମ, ଅନୁସନ୍ଧାନୀ କୁକୁରର ସହାୟତାରେ ପୋଲିସ ପକ୍ଷରୁ ଅନୁସନ୍ଧାନ କରାଯାଇଥିଲେ ମଧ୍ୟ କୌଣସି ସଫଳତା ମିଳିନଥିଲା । ଏପରିକି ନିକଟସ୍ଥ ପୋଖରୀ, ନାଳ, କୂଅ ଆଦି ପୋଲିସ ଖୋଜାଖୋଜି କରିଥିଲେ ମଧ୍ୟ କୌଣସି ସନ୍ଧାନ ମିଳିନଥିଲା । ମାତ୍ର ପ୍ରଥମରୁ ପୋଲିସର ସନ୍ଦେହ ଘେରକୁ ଆସିଥିବା ସେହି ଗ୍ରାମର ସାଗର ଦଳେଇ ଏବଂ ତାର ଭାଇକୁ ପୋଲିସ ମଙ୍ଗଳ ବାର ଦିନ ଉଠାଇ ଆଣି ଦଶପଲ୍ଲା ଥାନାରେ ପଚରା ଉଚରା କରିବା ପରେ ବେବି ନିଖୋଜ ଘଟଣାର ପର୍ଦ୍ଦାଫାଶ ହୋଇଥିଲା । ଘଟଣାଦିନ ମୋବାଇଲ ଦେଖାଇବା ପାଇଁ ସାଗର ବେବିକୁ ଗାଁ ପଛ ପାର୍ଶ୍ୱ ନିକଟରେ ଥିବା ଏକ କଦଳୀ ବାରିକୁ ଡାକି ନେଇଥିଲା । ପରେ କାମାନ୍ଧ ହୋଇ ଦୁଷ୍କର୍ମ କରିବା ପରେ ଏକ ପ୍ଲାଷ୍ଟିକ ଦଉଡିରେ ବେବିର ବେକକୁ ଭିଡି ହତ୍ୟା କରିଥିଲା ବୋଲି ପୋଲିସ ନିକଟରେ ପ୍ରକାଶ କରିବା ପରେ ବୁଧବାର ଦିନ ନୟାଗଡ ଏସ ପି ସିଦ୍ଧାର୍ଥର୍ କଟାରିୟା ,ନୟାଗଡ ଏସ ଡି ପି ଓ ଶୁଭେନ୍ଦୁ ସିହ୍ନା, ସାଇଣ୍ଟିଫିକ୍ ଟିମ, ଅନୁସନ୍ଧାନୀ କୁକୁର ଓ ଏକ ପ୍ଲାଟୁନ ପୋଲିସ ଘଟଣା ସ୍ଥଳରେ ପହଞ୍ଚି କଦଳୀବାରୀ ନିକଟ ଏକ ନାଳଠାରେ ବେବିର ଗଳିତ ଶବ ପଡିଥିବା ଦେଖିବାକୁ ପାଇଥିଲେ । ପରେ ସାଇଣ୍ଟିଫିକ୍ ଟିମ ସେଠାରେ ପହଂଚି ତଦନ୍ତ କରିଥିବା ବେଳେ ପୋଲିସ ବେବିର ଗଳିତ ଶବକୁ ଜବତ କରିଛି । ଏହି ଘଟଣାରେ ପୋଲିସ ପକ୍ଷରୁ ଏକ ହତ୍ୟା ମାମଲା ଦାୟର କରାଯାଇ ଶବ ବ୍ୟବଛେଦ କରାଯାଇଛି ।