ଗଜପତି,୩୦/୩- ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ପୌର ପରିଷଦ ଅଧ୍ୟକ୍ଷା ଦାୟିତ୍ୱ ଗ୍ରହଣ କରିଛନ୍ତି ନିର୍ମଳା ସେଠୀ । କାର୍ଯ୍ୟାଳୟ ପରିସରରେ ଆଜି ବହୁ ବିଜେଡି କର୍ମୀ ନେତା ଉପସ୍ଥିତ ରହି ନୂତନ ଭାବେ ଦାୟିତ୍ୱ ଗ୍ରହଣ କରିଥିବା ପୌର ପରିଷଦ ଅଧ୍ୟକ୍ଷାଙ୍କୁ ପୁଷ୍ପମାଲ୍ୟ ଓ ପୁଷ୍ପଗୁଚ୍ଛ ଦେଇ ସ୍ୱାଗତ ସମ୍ବର୍ଦ୍ଧନା ଦେଇଥିଲେ । ତତ୍ସହିତ ନବ ନିର୍ବାଚିତ ୱାର୍ଡ କାଉନସିଲର ମାନେ ମଧ୍ୟ ଉପସ୍ଥିତ ରହି ସ୍ୱାଗତ ଜଣାଇ ଥିଲେ । ଦାୟିତ୍ୱ ଗ୍ରହଣ ପରେ ବଜାର ଛକ ଠାରେ ଥିବା ମହାରାଜା ଶ୍ରୀ କୃଷ୍ଣଚନ୍ଦ୍ର ଗଜପତିଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରିବାସହ ହାଇସ୍କୁଲ ଛକ ଠାରେ ଥିବା ସ୍ୱର୍ଗତ ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରିଥିଲେ । ଦାୟିତ୍ୱ ଗ୍ରହଣ କଲାପରେ ନୂତନ ଭାବେ ପୌର ପରିଷଦ ଅଧ୍ୟକ୍ଷା ଗଣମାଧ୍ୟମକୁ ସୂଚନା ଦେଇଛନ୍ତି ଯେ ଦାୟିତ୍ୱ ଗ୍ରହଣ କରି ବହୁତ ଖୁସି ଅନୁଭବ କରିବାସହ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଓ କୃତଜ୍ଞତା ଜଣାଇଛନ୍ତି । ମୋ ଉପରେ ଜନସାଧାରଣ ଆଶା ଓ ବିଶ୍ୱାସ ପ୍ରକଟ କରି ଚୟନ କରିଥିବାରୁ ଆଜି ପୌର ପରିଷଦ ଅଧ୍ୟକ୍ଷା ହୋଇପାରିଛି ,ପାରଳା ଜନସାଧାରଣଙ୍କର ଜନସମର୍ଥନ ଓ ଭୋଟ ଦେଇ ଜୟଯୁକ୍ତ କରାଇଛନ୍ତି ତେଣୁ ପାରଳାବାସୀଙ୍କୁ କୃତଜ୍ଞତା ଜଣାଉଛି । ପାରଳାପୌର ପରିଷଦର ସର୍ବାଙ୍ଗୀନ ଉନ୍ନତି କରିବାସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକାଭିମୁଖୀ ଯୋଜନା ଯେପରି ପ୍ରକୃତ ହିତାଧିକାରୀ ପାଇପାରିବେ, ପ୍ରତ୍ୟେକ ଯୋଜନାର ସଫଳ ରୂପାୟନ ଯେପରି ହୋଇପାରିବ ଓ ପୌର ପରିଷଦ ଏକ ନମ୍ବର ପୌର ପରିଷଦ ହେବ ସେ ଉପରେ ଗୁରୁତ୍ୱ ଦେବି । ଏହି କାର୍ଯ୍ୟକ୍ରମରେ ରାଜଜେମା କଲ୍ୟାଣି ଗଜପତି, ବିଜେଡି ଜିଲ୍ଲା ସଭାପତି ପ୍ରଦୀପ ନାୟକ, ବରିଷ୍ଠ ବିଜେଡିନେତା ବସନ୍ତ ଦାସ, ବିଜେଡି ଯୁବ ସଭାପତି ଏସ. ଲିଙ୍ଗରାଜ, ଲକ୍ଷ୍ମୀକାନ୍ତ ପରିଚ୍ଛା, ଜମାଦାର ପଟ୍ଟନାୟକ, ସୁଧୀରଞ୍ଜନ ମହାପାତ୍ର, ରାଜେନ୍ଦ୍ର ବେହେରା, ପ୍ରଣୋଜ ପଟ୍ଟନାୟକ, ସୁରେଶ ମାଝୀଙ୍କ ସମେତ ବହୁ ବିଜେଡି ନେତା ଓ କର୍ମୀ ଉପସ୍ଥିତ ରହିଥିଲେ । ନୂତନ ଅଧ୍ୟକ୍ଷା ଯୋଗଦେଇଥିବାରୁ ଆଜି ପୌର ପରିଷଦ କାର୍ଯ୍ୟାଳୟ ଓ ସହରରେ ଖୁସିର ଲହରୀ ଖେଳିଯାଇଛି ।