ଫୁଲବାଣୀ: ଜାଗ୍ରତ କନ୍ଧମାଳ ପକ୍ଷରୁ ଆଜି ଫୁଲବାଣୀଠାରେ ବାବା ସାହେବ ଆମ୍ବେଦକର ଜୟନ୍ତୀ ଉତ୍ସବ ପାଳିତ ହୋଇଛି । ସକାଳୁ ଫୁଲବାଣୀ ସାହୀ ଠାରେ ଥିବା ଡଃ ବାବା ସାହେବ ଭୀମରାଓ ଆମ୍ବେଦକରଙ୍କ ପ୍ରତିମୂର୍ତ୍ତୀରେ ପୁଷ୍ପମାଲ୍ୟାର୍ପଣ କରାଯାଇଥିଲା । ଏଥିରେ ଜାଗ୍ରତ କନ୍ଧମାଳର ସଭାପତି ପ୍ରଶାନ୍ତ ମହାନ୍ତି, ସଂପାଦକ ସତ୍ୟନାରାୟଣ ବେହେରା, ଉପଜିଲାପାଳ ଶେଷଦେବ ମିଶ୍ର, ବରିଷ୍ଠ ସାମ୍ବାଦିକ ସନ୍ତୋଷ ଡିଗଲ, ସୂର୍ଯ୍ୟ ନାରାୟଣ ବେହେରା, କଣ୍ଠଶିଳ୍ପୀ ଜଳନ୍ଧର ବେହେରା, ଜିଲା ମଙ୍ଗଳ ଅଧିକାରୀ, ସହ ସଂପାଦକ ରମେଶ ପ୍ରଧାନ ପ୍ରମୁଖ ଯୋଗଦେଇ ପୁଷ୍ପମାଲ୍ୟ ଅର୍ପଣ କରିଥିଲେ । ଏହି ଅବସରରେ ପ୍ରେସ କ୍ଲବଠାରେ ଜାଗ୍ରତ କନ୍ଧମାଳର ସାଧାରଣ ସଂପାଦକ ସତ୍ୟନାରାୟଣ ବେହେରା ସଭାପତିତ୍ୱରେ ଆୟୋଜିତ ସଭାରେ ମୁଖ୍ୟ ଅତିଥି ଭାବରେ ପୂଜାରୀ ଖଣ୍ଡାୟତର ସଭାପତି ଶ୍ୱେତାବନ ପୂଜାରୀ ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବରେ ସାମ୍ବାଦିକ ବ୍ରଜବିହାରୀ ନନ୍ଦ ଯୋଗ ଦେଇଥିଲେ । ସେହିପରି ସମ୍ମାନିତ ଅତିଥି ଭାବରେ ଶ୍ରମିକନେତା ଘନ କୁମାର ଶବର, ଅବସରପ୍ରାପ୍ତ କର୍ମଚାରୀ ସଂଘର ସଭାପତି ସର୍ବେଶ୍ୱର ମିଶ୍ର, ପ୍ରେସ କ୍ଲବ ସମ୍ପାଦକ ପ୍ରଶାନ୍ତ କୁମାର ବେହେରା, କିରଟି ଦିଗାଲ, ମହେଶ୍ୱର ପ୍ରଧାନ, ପ୍ରଶାନ୍ତ କୁମାର ପଣ୍ଡା, ସାମ୍ବାଦିକ ଫୁଲବାଣୀ, ଶିକ୍ଷକ ଆଦିତ୍ୟ ସାହଣୀ, ସମାଜସେବୀ ସଞ୍ଜିତ ମଣ୍ଡଳ ପ୍ରମୁଖ ଅତିଥିମାନେ ଯୋଗଦେଇ ସମ୍ବିଧାନ ପ୍ରଣୟନ ଓ ସମାଜ ସୁଧାର ଦିଗରେ ଡଃ.ଭୀମରାଓ ଆମ୍ବେଦକରଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋଚନା କରିଥିଲେ । ଦଳିତମାନଙ୍କ ପାଇଁ ଆମ୍ବେଦକର ସମ୍ବିଧାନ ପ୍ରଣୟନ ସହିତ କିପରି ପ୍ରତ୍ୟେକ ମଣିଷ ସୁଖ ସ୍ୱଚ୍ଛନ୍ଦରେ ଉଚିତ ନ୍ୟାୟିକ ଅଧିକାର ପାଇପାରିବ ସେଥିପ୍ରତି ଦୃଷ୍ଟିଦେଇଥିଲେ ବୋଲି ବକ୍ତାମାନେ ମତ ଦେଇଥିଲେ । ଅତିଥି ପରିଚୟ ସତ୍ୟ ନାରାୟଣ ବେହେରା ଦେଇଥିବା ବେଳେ ଶେଷରେ ଜାଗ୍ରତ କନ୍ଧମାଳର ସହ ସଂପାଦକ ରମେଶ ପ୍ରଧାନ ଧନ୍ୟବାଦ ଅର୍ପଣ କରିଥିଲେ ।