ସମ୍ବଲପୁର:ଗତକାଲି ଘଟିତ ଏକ ଅପହରଣ ମାମଲାର ମାତ୍ର ବାର ଘଣ୍ଟା ଭିତରେ ଶାସନ ଥାନା ପୁଲିସ ଏଥିରେ ସମ୍ପୃକ୍ତ ଚାରିଜଣ ଅପହରଣକାରୀ ଙ୍କୁ ଗିରଫ କରିବାରେ ସଫଳ ହୋଇଛି । ଏବିଷୟରେ ସଦର ଏସଡିପିଓ ତପନ ମହାନ୍ତି ଙ୍କ ଠାରୁ ମିଳିଥିବା ସୂଚନା ଅନୁସାରେ ଗତକାଲି ମଧ୍ୟାହ୍ନ ପ୍ରାୟ ଗୋଟାଏ ସମୟରେ ସ୍ଥାନୀୟ ଶାସନ ଥାନା ଅନ୍ତର୍ଗତ ପଣ୍ଡିଆପାଲି ଠାରେ ଏହି ଘଟଣା ହୋଇଥିଲା । ଉକ୍ତ ଗ୍ରାମର ଜଣେ ମହିଳା ସୁନୀତା ଓରାମ ଲିଖିତ ଅଭିଯୋଗ କରିଥିଲେ ଯେ ଦୁଇ ଜଣ ବ୍ୟକ୍ତି ଏକ ମୋଟରସାଇକେଲରେ ତାଙ୍କ ସାନଭାଇ ସଞ୍ଜୟ ଓରାମ କୁ ବଳପୂର୍ବକ ଉଠାଇ ନେଇଛନ୍ତି ଓ ତାଙ୍କୁ ଛାଡ଼ିବା ପାଇଁ ୨୫ହଜାର ଟଙ୍କା ଦାବି କରିଛନ୍ତି । ଏହି ମାମଲାରେ ସଙ୍ଗେ ସଙ୍ଗେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ଗତରାତି ଚାରିଜଣ ଙ୍କୁ ଗିରଫ କରାଯାଇଛି । ଏହି ଚାରିଜଣ ଅଭିଯୁକ୍ତଙ୍କୁ ଚିନ୍ମୟ ରୋହିଦାସ (୧୯), ଇନ୍ଦ୍ରମଣି ରୋହିଦାସ (୧୯), ଏମଡି ଇକ୍ରାମ (୧୯) ଓ ସୁଶାନ୍ତ ତନ୍ତି (୨୬) ରୂପେ ଚିହ୍ନଟ କରାଯାଇଛି । ସେମାନଙ୍କ ଠାରୁ ଉକ୍ତ ଅପହରଣ ପାଇଁ ବ୍ୟବହୃତ ମୋଟରସାଇକେଲ ଓ ପାଞ୍ଚଟି ମୋବାଇଲ ଫୋନ ମଧ୍ୟ ଜବତ କରାଯାଇଛି । ସବୁ ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରାଯାଉଛି ବୋଲି ସେ ଜଣାଇଛନ୍ତି ।