ବାଲିଗୁଡ଼ା: ଗଞ୍ଜେଇ ଚୋରାଚାଲାଣ ବେଳେ କନ୍ଧମାଳ ଜିଲ୍ଲା ବାଲିଗୁଡ଼ା ପୋଲିସ ପକ୍ଷରୁ ଚଢ଼ାଉ । ବାଲିଗୁଡ଼ା ଥାନା ସିନ୍ଦ୍ରିଗାଁ ନିକଟ ମହାସିଙ୍ଗପାଙ୍ଗା ନିକଟରୁ ୧୫୦ କେଜି ୬୫୦ଗ୍ରାମ୍ ଗଞ୍ଜେଇ ସହ ଅଟୋ ଜବତ କରିଛି ପୋଲିସ୍ । ଘଟଣାରେ ଜଣେ ଚାଲାଣକାରୀକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ସୂଚନା ପ୍ରକାରେ ସବ୍ ଇନ୍ସପେକ୍ଟର ସସ୍ମିତା ପ୍ରଧାନ ଅନ୍ୟ ପୋଲିସ୍ କର୍ମଚାରୀଙ୍କୁ ସାଙ୍ଗରେ ନେଇ ପେଟ୍ରୋଲିଂ କରୁଥିବା ବେଳେ ପୋଲିସକୁ ଦେଖି ଏକ ଅଟୋ ଦ୍ରୁତ ଗତିରେ ଯାଉଥିଲା । ଅଟୋକୁ ପିଛାକରି ସିନ୍ଦ୍ରିଗାଁ ନିକଟ ମହାସିଙ୍ଗପାଙ୍ଗା ଠାରେ କାବୁ କରିଥିଲେ । ଅଟୋ ଯାଞ୍ଚ୍ କଲାବେଳେ ସେଥିରୁ ୧୫୦କେଜି ୬୫୦ଗ୍ରାମ୍ ଗଞ୍ଜେଇ ପାଇଥିଲା ପୋଲିସ୍ ।
ଏହି ଗଞ୍ଜେଇ ସିନ୍ଦ୍ରିଗାଁ ଅଞ୍ଚଳରୁ ଫୁଲବାଣୀ ଚୋରାଚାଲାଣ ହେଉଥିବା ବେଳେ ଜବତ ଗଞ୍ଜେଇର ଆନୁମାନିକ ମୂଲ୍ୟ ୭ଲକ୍ଷ ୫୦ହଜାର ଟଙ୍କାରୁ ଉର୍ଦ୍ଧ୍ୱ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି । ଗିରଫ ଚାଲାଣକାରୀ ଜଣକ ବାଲିଗୁଡ଼ା ଥାନା ମହାସିଙ୍ଗିପାଙ୍ଗା ଅଞ୍ଚଳର ବିଦ୍ୟାଧର ମଲ୍ଲିକ ହୋଇଥିବା ଜଣାପଡ଼ିଛି । ଗୋଟିଏ ପଟେ ପୋଲିସ୍ ଓ ଅବକାରୀ ବିଭାଗ ପକ୍ଷରୁ ଅପରେସନ ନୀଳ ଜହର ମାଧ୍ୟମରେ ଶହଶହ ଏକର ଜଙ୍ଗଲ ଜମିରେ ହୋଇଥିବା ବେଆଇନ୍ ଗଞ୍ଜେଇ ଚାଷ ନଷ୍ଟ କରାଯାଉଛି । ଅନ୍ୟପଟେ ଗଞ୍ଜେଇ ମାଫିଆମାନେ ପୂର୍ବରୁ ଗଚ୍ଛିତ ରଖିଥିବା ଗଞ୍ଜେଇ ଚୋରାଚାଲାଣ ଚଲାଇଛନ୍ତି । ଘଟଣାକୁ ଦୃଷ୍ଟିରେ ରଖି ବାଲିଗୁଡ଼ା ପୋଲିସ୍ ପକ୍ଷରୁ ଗଞ୍ଜେଇ ମାଫିଆଙ୍କୁ ଚେକ୍ ଦେବାପାଇଁ ବିଭିନ୍ନ ପନ୍ଥା ଆପଣେଇବା ସହ ପେଟ୍ରୋଲିଂ ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା କହିଛନ୍ତି ଥାନା ଅଧିକାରୀ ବାବାଶଙ୍କର ସରାଫ୍ ।