ଚମ୍ପୁଆ : ଚମ୍ପୁଆ ସଦର ମହକୁମାରେ ଦିନକୁ ଦିନ ମାଙ୍କଡଙ୍କ ଉପଦ୍ରବ ବଢିବାରେ ଲାଗିଲାଣି । ରଜିଆ ଜଙ୍ଗଲରେ କିଛି ଦିନ ହେବ ଏହି ମାଙ୍କଡଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଅନେକ ପନି ପରିବା ଚାଷ ଉଜୁଡିବାରେ ଲାଗିଲାଣି । ଏପରିକି ଏହି ମାଙ୍କଡ ମାନଙ୍କ ଉପଦ୍ରବ ଚମ୍ପୁଆ ସଦର ମହକୁମାରେ ମଧ୍ୟ ଦେଖିବାକୁ ମିଳିଲାଣି । ଗତ ରବିବାର ଦିନ ଚମ୍ପୁଆ ବ୍ଲକ ନିକଟରେ ଥିବା ମିଶ୍ର କଲନିରେ ୨ ଗୋଟି ମାଙ୍କଡ ଏମ୍.ଡି ଆଲାମଙ୍କ ଘର ଭିତରକୁ ପଶି ୩ ବର୍ଷର ବାଳକ ଜୁହାଇବ୍ ଆଲାମକୁ ଘୋଷାଡି ନେବା ପାଇଁ ଉଦ୍ୟମ କରି ବିଫଳ ହେବାରୁ ରାମ୍ପୁଡି ଦାବୁଡି ତାଙ୍କୁ ଲହୁ ଲୁହାଣ କରିଦେଇଥିଲେ । ମାଙ୍କଡ ଆକ୍ରମଣ ବେଳେ ଜୁହାଇଦ୍ ଜୋରରେ କାନ୍ଦିବାରୁ ଘର ଲୋକ ଦୌଡି ଆସିଥିଲେ । ପରିବାର ଲୋକ ପାଟି କରିବାରୁ ମାଙ୍କଡ ୨ଟି ସ୍ଥାନ ଛାଡି ପାଳାଇ ଯାଇଥିଲେ । ଦିନକୁ ଦିନ ବୃଦ୍ଧି ପାଉଥିବା ଏହି ମାଙ୍କଡ ଉପଦ୍ରବ ରୋକିବା ପାଇଁ ବନ ବିଭାଗ ପଦକ୍ଷେପ ନେଉ ବୋଲି ସାଧାରଣରେ ଦାବି ଅଛି ।