ରେଢ଼ାଖୋଲ:ସମ୍ବଲପୁର-ଖୋର୍ଦ୍ଧା ରେଳଲାଇନର ଚାରମାଳ ଥାନା ମୋଚିବାହାଳ ଗ୍ରାମ ନିକଟସ୍ଥ ରେଳ ଧାରଣାରୁ ସନ୍ଧ୍ୟା ପ୍ରାୟ ୫ଟା ଜଣେ ଯୁବକର ମୃତଦେହ ରେଳବାଇ ପୁଲିସ ଉଦ୍ଧାର କରିଛି । ମୃତ ଯୁବକ ଜଣକ ହେଲେ ରେଢ଼ାଖୋଲ ଥାନା ପୋଡାବଲଣ୍ଡା ଗ୍ରାମର ସୁଦର୍ଶନ ପ୍ରଧାନ (୨୨)ବୋଲି ଜଣାପଡିଛି । ଏନେଇ ରେଳବାଇ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ବୁର୍ଲା ପଠାଇ ଘଟଣାର ତଦନ୍ତ କରୁଥିବା ଜଣାପଡିଛି । ସୂଚନା ମତେ ଗୁରୁବାର ଅପରାହ୍ନରେ ରେଢ଼ାଖୋଲ-ସମ୍ବଲପୁର ରେଳ ଧାରଣା ଯାଞ୍ଚ କରୁଥିବା ଜଣେ ଟ୍ରାକ ମ୍ୟାନ ମୋଚିବାହାଳ ଗ୍ରାମ ନିକଟସ୍ଥ ରେଳ ଧାରଣାରେ ଏକ ଶବ ପଡ଼ିଥିବା ଦେଖି ରେଳବାଇ ପୁଲିସକୁ ସୂଚନା ଦେଇଥିଲେ । ଖବର ପାଇ ରେଳବାଇ ପୁଲିସ ପହଂଚି ଶବ ଜବତ କରି ପରିଚୟ ପାଇଁ ପ୍ରଥମେ ତଦନ୍ତ କରି ମୃତ ଯୁବକ ରେଢ଼ାଖୋଲ ଥାନା ପୋଡାବଲଣ୍ଡା ଗ୍ରାମର ବୋଲି ଜାଣିବାକୁ ପାଇ ପରିବାର ସଦସ୍ୟଙ୍କୁ ଖବର କରିଥିଲେ ।