ସୋନପୁର,୭/୩- ସୁବର୍ଣ୍ଣପୁର ଜିଲ୍ଲା ଅନ୍ତର୍ଗତ ବୀରମହାରାଜପୁର ଉପଖଣ୍ଡର ସୁବଳୟା ଥାନା ଟିକ୍ରାପଡାରେ ପୂର୍ବ ଶତୃତାକୁନେଇ ଏକ ଗୁଳିକାଣ୍ଡ ଘଟି ଜଣେ ଯୁବକର ମୃତ୍ୟୁ ହୋଇଥିବା ଜଣାପଡିଛି । ପଡୋଶୀ ଯୁବକ ବବଲୁ ମେହେର(୨୯) ଓ ମୁରଲୀ ମେହେର(୩୫) ଙ୍କ ପରିବାର ମଧ୍ୟରେ ପୂର୍ବ ଶତୃତା ଲାଗି ରହିଥିଲା । କିଛି ଦିନ ପୂର୍ବରୁ ଉଭୟ ମଧ୍ୟରେ କିଛି ଗଣ୍ଡଗୋଳ ଘଟି ଥାନା ପର୍ଯ୍ୟନ୍ତ କଥା ଯାଇଥିଲା । କିନ୍ତୁ ପରବର୍ତ୍ତୀ ସମୟରେ ଏହା ଅତ୍ୟନ୍ତ ଉଗ୍ରରୁପ ଧାରଣ କରି ଏକ ହତ୍ୟାକାଣ୍ଡର ରୂପ ନେଇଥିବା ଯୋଗୁଁ ସମଗ୍ର ଜିଲ୍ଲାରେ ଏ ଘଟଣା ଚାଞ୍ଚଲ୍ୟ ସୃଷ୍ଟି କରିଛି । ମିଳିଥିବା ସୂଚନା ଅନୁଯାୟୀ ଗତକାଲି ସଂଧ୍ୟାରେ ମୁରଲୀ ହଠାତ ପଡୋଶୀ ବବଲୁଙ୍କ ଘରକୁ ପଶି ଗୁଳି ଚଳାଇଥିବା ଅଭିଯୋଗ ହୋଇଛି । ଗୁରୁତର ଆହତ ବବଲୁକୁ ବୀରମହାରାଜପୁର ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଯାଇଥିଲେହେଁ ସେଠାରେ ତାଙ୍କର ମୃତ୍ୟୁ ହୋଇଥିଲା । ଅପରପକ୍ଷରେ ମୁରଲୀକୁ ଥାନାରେ ଅଟକ ରଖି ପୁଲିସ ଅଧିକ ଅନୁସନ୍ଧାନ ଜାରିରଖିଛି । ହତ୍ୟାକାଣ୍ଡର ପ୍ରକୃତ କାରଣ ଜଣାପଡିନଥିଲେହେଁ ପୂର୍ବ ଶତୃତା ଯୋଗୁଁ ଏହା ଘଟିଥିବା ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ।