ସୁବର୍ଣ୍ଣପୁର : ପ୍ରଜାପିତା ବ୍ରହ୍ମକୁମାରୀ ଈଶ୍ୱରୀୟ ବିଶ୍ୱ ବିଦ୍ୟାଳୟ ପକ୍ଷରୁ ଈଶ୍ୱରୀୟ ସେବାର ୫୦ ବର୍ଷ ପୂର୍ତ୍ତି ଅବସରରେ ସୁବର୍ଣ୍ଣପୁରଠାରେ ପଶ୍ଚିମ ଓଡିଶାସ୍ତରୀୟ ସୁବର୍ଣ୍ଣ ଜୟନ୍ତୀ ସମାରୋହ ଅନୁଷ୍ଠିତ ହୋଇଯାଇଛି । ପ୍ରଜାପିତା ବ୍ରହ୍ମକୁମାରୀ ଈଶ୍ୱରୀୟ ବିଶ୍ୱ ବିଦ୍ୟାଳୟ,ସୁବର୍ଣ୍ଣପୁର ଶାଖା ପକ୍ଷରୁ ଆୟୋଜିତ ଏହି ସମାବେଶରେ ରାଜଯୋଗିନୀ ବ୍ରହ୍ମାକୁମାରୀ ପାର୍ବତୀ ଜୀ ମୁଖ୍ୟ ଅତିଥି ଭାବେ ଯୋଗଦେଇ ଉତ୍ତମ ସମାଜ ଗଠନରେ ସମର୍ପିତ ଭାବନା ଓ କର୍ତ୍ତବ୍ୟ ଆଜିର ଦିନରେ ଅପରିହାର୍ଯ୍ୟ ବୋଲି ଉଦବୋଧନ ଦେଇଛନ୍ତି । ଅନ୍ୟତମ ଅତିଥି ଭାବେ ଓଡିଶା ଲୋକାୟୁକ୍ତ ସଦସ୍ୟ ଡ.ଦେବବ୍ରତ ସ୍ୱାଇଁ ସୁଖ,ଶାନ୍ତି ଓ ପରମାର୍ଥିକ ଦିବ୍ୟାନୁଭବ ପାଇବାକୁ ହେଲେ ଈଶ୍ୱରୀୟ ଧୂନକୁ ମନ୍ତ୍ର ଭାବେ ଜପିବାକୁ ହେବ ବୋଲି ଉପସ୍ଥିତ ଦୀକ୍ଷିତଙ୍କୁ ଆହ୍ୱାନ ଦେଇଥିଲେ । ଏହି ଅବସରରେ ରାଜଯୋଗିନୀ ପାର୍ବତୀ ଜୀଙ୍କ ଦ୍ୱାରା ସୁବର୍ଣ୍ଣପୁର ଜିଲ୍ଲା ଶାଖାର ସେବା ଓ ପାଠଶାଳାର ନିଜସ୍ୱ କାର୍ଯ୍ୟାଳୟ “ସ୍ୱର୍ଣ୍ଣିମ ଭବନ’ ଉଦଘାଟିତ ହୋଇଯାଇଛି । ମହାନଦୀ-ତେଲ ନଦୀର ସଂଗମସ୍ଥିତ ପାନ୍ଥଶାଳା ପରିସରରେ ଅନୁଷ୍ଠିତ ସମାବେଶରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଥିଲା । ସୁବର୍ଣ୍ଣ ଜୟନ୍ତୀ ସମାରୋହରେ ସୁବର୍ଣ୍ଣପୁର ଜିଲ୍ଲା ସମେତ ସମ୍ବଲପୁର, ବରଗଡ, ଦେବଗଡ, ଝାରସୁଗୁଡା, ବୌଦ୍ଧ ଓ ବଲାଙ୍ଗିର ଜିଲ୍ଲାର ବ୍ରହ୍ମକୁମାର ଓ ବ୍ରହ୍ମକୁମାରୀମାନେ ଅଂଶଗ୍ରହଣ କରିଥିଲେ ।