ଘୁ.ଉଦୟଗିରି: କନ୍ଧମାଳ ଜିଲ୍ଲା ଘୁ.ଉଦୟଗିରି ଥାନା କଳିଙ୍ଗା ଘାଟିରେ ଗତକାଲି ସନ୍ଧ୍ୟା ପ୍ରାୟ ୭.୩୦ରେ ପଶ୍ଚିମବଙ୍ଗର ପୂର୍ବ ମେଦିନିପୁର ଜିଲ୍ଲା ଗୋବିନ୍ଦପୁର ଗାଁରୁ ଆସିଥିବା ଏକ ପର୍ଯଟକଙ୍କ ଗାଡି ଦୁର୍ଘଟଣାଗ୍ରସ୍ତ ହୋଇଥିବା ଜଣାପଡିଛି । ଏଥିରେ ୪୫ରୁ ଊର୍ଦ୍ଧ୍ୱ ଯାତ୍ରୀ ଆହତ ହୋଇଥିବା ବେଳେ ୩ ଜଣଙ୍କ ଅବସ୍ଥା ଗୁରୁତର ହୋଇଛି । ଗୁରୁତରମାନଙ୍କୁ ବ୍ରହ୍ମପୁର ବଡମେଡିକଲକୁ ସ୍ଥାନାନ୍ତରିତ କରାଯାଇଛି । ଖବର ପାଇ ଘଟଣାସ୍ଥଳରେ ୧୦୮ଆମ୍ବୁଲାନ୍ସ ଏବଂ ଦମକଳବାହିନୀର ଗାଡି ପହଞ୍ଚି ଆହତମାନଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି । ଖବରଲେଖା ହେବା ପର୍ଯ୍ୟନ୍ତ ଆହତଙ୍କୁ ଘୁ.ଉଦୟଗିରି ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଉଥିବା ଜଣାପଡିଛି । ଥାନାଧିକାରୀ ରେବତୀ ଶବର ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କାର୍ଯ୍ୟରେ ସହଯୋଗ କରିବା ସହ ତଦନ୍ତ ଜାରି ରଖିଥିବା ସୂଚନା ମିଳିଛି ।
ସୂଚନା ପ୍ରକାରେ ପଶ୍ଚିମବଙ୍ଗର ଗୋବିନ୍ଦପୁରରୁ ୬୦ଜଣ ପର୍ଯ୍ୟଟକଙ୍କୁ ନେଇ ଏକ ପର୍ଯ୍ୟଟକ ବସ୍ ନଂ(ଡବ୍ଳୁବି୨୯ଏ ୨୯୯୯) ପ୍ରାୟ ୬୦ ପର୍ଯ୍ୟଟକଙ୍କୁ ନେଇ ଦାରିଙ୍ଗବାଡିରେ ଆସିଥିବା ବେଳେ ସନ୍ଧ୍ୟାରେ ବଣଭୋଜି ସାରି ପୁରୀ ଅଭିମୁଖେ ବାହାରି ଥିଲେ । ଗତକାଲି ରାତିରେ ଗୋପାଳପୁର ରହି ଆଜି ପୁରୀ ଅଭିମୁଖେ ବାହାରିବାର ଯୋଜନା ପ୍ରସ୍ତୁତ କରିଥିଲେ । ବସ୍ଟି ୬ କିମି କଳିଙ୍ଗା ଘାଟି ଅତିକ୍ରମ କରି ସାରିବା ପରେ ଅନ୍ଧାରକୋଟ ତୀକ୍ଷ୍ଣ ବୁଲାଣି ନିକଟରେ ବ୍ରେକ୍ଫେଲ ହୋଇଯିବାରୁ ପାର୍ଶ୍ୱସ୍ଥ ଗାର୍ଡୱାଲକୁ ଧକ୍କା ଦେଇ ଓଲଟି ପଡିଥିଲା । ଫଳରେ ବସ୍ରେ ବସିଥିବା ଯାତ୍ରୀ ଭିତରେ ରହିଯାଇଥିଲେ । ଏହି ସମୟରେ ଟିକାବାଲିରୁ ଭଞ୍ଜନଗର ଯାଉଥିବା ଏକ କାରର ଯାତ୍ରୀ ଓହ୍ଲାଇ ଆଗପଟୁ କାଚ ଭାଙ୍ଗି ଯାତ୍ରୀଙ୍କୁ ଉଦ୍ଧାର କରିଥିବା ସହ ଆମ୍ବୁଲାନ୍ସ ଓ ଦମକଳ କେନ୍ଦ୍ରକୁ ଖବର ଦେଇଥିଲେ ।
୧୦ଜଣଙ୍କୁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିବା ବେଳେ ଆଜି ଘୁ ଉଦୟଗିରି ତହସିଲଦାର ଓ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଶକ୍ତିକାନ୍ତ ମଲ୍ଲିକ ଓ ଟିକାବାଲି ଅଡିସନାଲ ତହସିଲଦାର ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ର ପରିଦର୍ଶନ କରି ଆହତଙ୍କ ଅବସ୍ଥା ବୁଝିଥିଲେ । ଗତ ରାତ୍ରି ଠାରୁ ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଥିବା ଲୋକମାନଙ୍କୁ ସଂଜୀବନି ପାଥଲୋଜି ପକ୍ଷରୁ ଖାଦ୍ୟ ମାଗଣାରେ ଯୋଗାଉଥିବା ସୂଚନା ରହିଛି । ବାହାର ରାଜ୍ୟର ଲୋକେ ଆମ ଅଂଚଳରେ ଦୁର୍ଘଟଣା ଦ୍ୱାରା କଷ୍ଟ ପାଉଥିବା ଲୋକଙ୍କ ନିମନ୍ତେ ଅନୁକମ୍ପା ଦେଖାଇଛନ୍ତି ଭାଇ ନିତ୍ୟସୁନ୍ଦର ଦାସ ଓ ଜଗନ୍ନାଥ ରଥ ସମେତ ହିମାଂଶୁ ଶେଖର, ଚିକୁ ପ୍ରଧାନ, ଶିବାନୀ ପ୍ରସାଦ ମିଶ୍ର ସହଜଗ କରିଥିଲେ । ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ସମସ୍ତଙ୍କୁ ଉତ୍ତମ ଚିକିତ୍ସା ଯୋଗେଇଦେବା ପାଇଁ ପ୍ରୟାସ କରାଯାଉଥିବା ସୂଚନା ରହିଛି । ଯେପରି ସୁସ୍ଥ ହେଲେ ସେମାନେ ନିଜ ନିଜ ଅଞ୍ଚଳକୁ ଫେରିବେ ।