ପ୍ରତିଦିନ ଝଗଡ଼ାରୁ ଘଟିଲା ଜଘଣ୍ୟ କାଣ୍ଡ I
ଗୁରୁଗ୍ରାମ : ମଦ ପିଇବାକୁ ପତ୍ନୀ ମନା କରୁଥିବାରୁ ପ୍ରତିଦିନ ଝଗଡ଼ା ହୁଏ ଏବଂ ସେହି ଝଗଡା ଏକ ଜଘଣ୍ୟ କାଣ୍ଡର ରୂପ ଧରିଛି। ଦିନେ ଝଗଡ଼ା ଏତେ ବଢିଯାଇଥିଲା ଯେ ସ୍ୱାମୀ ତକିଆରେ ପତ୍ନୀଙ୍କ ପାଟିକୁ ଚାପି ଚେତାଶୂନ୍ୟ କରିଦେଲା। ପରେ ପତ୍ନୀର ଗଳା କାଟି ହତ୍ୟା କରିଥିଲା। ମୃତଦେହକୁ ଏକ ବସ୍ତାରେ ରଖି ସେକ୍ଟର-୫୨ରେ ଫିଙ୍ଗି ଦେଇଥିଲା। ଏହି ଘଟଣା ପରେ ଅଭିଯୁକ୍ତ ବୃନ୍ଦାବନକୁ ଫେରାର ହୋଇଯାଇଥିଲା। ସେଠାରେ ପରିଚୟ ଲୁଚାଇବାକୁ ଲଣ୍ଡା ହୋଇଥିଲା। ଏକ ଧର୍ମଶାଳାରେ ରହି ନାମ-ସଂକୀର୍ତ୍ତନ କରିଥିଲା।
ଗୁରୁଗ୍ରାମରୁ କ୍ରାଇମବ୍ରାଞ୍ଚ ଟିମ୍ ଯାଇ ପତ୍ନୀ ହତ୍ୟାକାରୀ ଅଭିଯୁକ୍ତକୁ ଗିରଫ କରି ପୂରା ଘଟଣାର ପର୍ଦ୍ଦାଫାସ କରିଛି। ଏସିପି (କ୍ରାଇମ) ବରୁଣ କୁମାର କହିଛନ୍ତି ଯେ ଅଗଷ୍ଟ ୧୮ରେ ରୋହନ ମୋଟର୍ସ ସେକ୍ଟର-୫୨ ନିକଟରେ ଏକ ବସ୍ତାରୁ ଜଣେ ମହିଳାଙ୍କ ମୃତଦେହ ମିଳିଥିଲା। ପୁଲିସ ଏକ ହତ୍ୟା ମାମଲା ରୁଜୁ କରିଥିଲା। ତଦନ୍ତ ଦାୟିତ୍ୱ କ୍ରାଇମବ୍ରାଞ୍ଚ-୪୦କୁ ହସ୍ତାନ୍ତର କରାଯାଇଥିଲା। ମହିଳା ଜଣକ ତାଙ୍କ ସ୍ୱାମୀଙ୍କ ସହ ଏକ ଭଡ଼ା ଘରେ ରହୁଥିବା ଜଣାପଡ଼ିଥିଲା। ଏହି ଘଟଣା ପରେ ସ୍ୱାମୀ ଫେରାର ହୋଇଯାଇଥିଲା। କ୍ରାଇମବ୍ରାଞ୍ଚ ସେକ୍ଟର-୪୦ ପ୍ରଭାରୀ ଅମିତ କୁମାର କହିଛନ୍ତି ଯେ ଟିମ୍ ଅଭିଯୁକ୍ତ ପଶ୍ଚିମବଙ୍ଗର ବାସିନ୍ଦା ବିଲଟୁ ସରକାରକୁ ଗିରଫ କରିଛି। ଅଭିଯୁକ୍ତ ଜଣକ କହିଛନ୍ତି ଯେ ସେ ମଦ୍ୟପାନ କରନ୍ତି, ଯେଉଁକାରଣରୁ ତାଙ୍କ ପତ୍ନୀଙ୍କ ସହ ଝଗଡ଼ା ହୋଇଥିଲା। ଅସନ୍ତୁଷ୍ଟ ହୋଇ ପତ୍ନୀ ତାଙ୍କୁ ଛାଡିବା କଥା କହୁଥିଲେ, ଯାହାକୁ ନେଇ ସେ ରାଗି ଯାଇ ଅଗଷ୍ଟ ୧୭ ତାରିଖରେ ପତ୍ନୀଙ୍କ ପାଟିକୁ ତକିଆରେ ଚାପି ଦେଇଥିଲେ, ଯାହା ଫଳରେ ସେ ଅଚେତ ହୋଇଯାଇଥିଲେ। ଏହାପରେ ତାଙ୍କୁ ଗଳା କାଟି ହତ୍ୟା କରାଯାଇଥିଲା।
ପଚରାଉଚରାରେ ବେଳେ ଅଭିଯୁକ୍ତ କହିଛି ଯେ ହତ୍ୟାକାଣ୍ଡ ପରେ ମୃତଦେହକୁ ପୋତିବା ପାଇଁ ସେ ଦୋକାନରୁ ଏକ ଧଳା ରଙ୍ଗର ବସ୍ତା କିଣିଥିଲା। ମୃତଦେହକୁ ସେହି ବସ୍ତାରେ ରଖି ନିଜ ସ୍କୁଟିରେ ନେଇ ସେକ୍ଟର-୫୨ରେ ଥିବା ଏକ ଅଳିଆ ଟ୍ରଲିରେ ରଖିଥିଲା। ଅଧିକ ଓଜନ ହେତୁ ମୃତଦେହକୁ ଅଳିଆ ଟ୍ରଲିରେ ରଖାଯାଇ ନପାରି ରୋହନ ମୋଟର୍ସ ନିକଟରେ ରଖାଯାଇଥିଲା। ଏହାପରେ ଭଡ଼ା ଘର ଖାଲି କରି ବୃନ୍ଦାବନକୁ ପଳାଇଥିଲେ। ପୁଲିସ ନଜରରେ ନପଡ଼ିବା ପାଇଁ କେଶ ମଧ୍ୟ କାଟି ଦେଇଥିଲା। ଗିରଫ ପରେ ଅଧିକ ପଚରାଉଚରା ପାଇଁ ପୁଲିସ ତାଙ୍କୁ ଦିନିକିଆ ରିମାଣ୍ଡରେ ନେଇଛି।
ପଚରାଉଚରା ବେଳେ ଅଭିଯୁକ୍ତ କହିଛି ୧୨ ବର୍ଷ ତଳେ ବିବାହ କରିଥିଲା। ତାଙ୍କର ଦୁଇଟି ସନ୍ତାନ। ଦୁହେଁ ପଶ୍ଚିମବଙ୍ଗରେ ଜେଜେମା’ ଓ ଜେଜେବାପାଙ୍କ ସହ ରୁହନ୍ତି। ଅଭିଯୁକ୍ତ ଜଣକ ଫୁଡ୍ ଡେଲିଭରି କାମ କରୁଥିଲେ। ଏହି ଘଟଣା ପରେ ସେ ଭୟଭୀତ ହୋଇପଡ଼ିଥିଲେ। ସେ ତରବରିଆ ଭାବେ ଭଡ଼ା ଘର ଖାଲି କରି ସ୍କୁଟିରେ ବୃନ୍ଦାବନ ଯାଇଥିଲେ। ଟଙ୍କା ଅଭାବରୁ ସେ ସେଠାରେ ନିଜର ରୂପ ବଦଳାଇ ଏକ ଧର୍ମଶାଳାରେ ରହିବା ସହିତ ମନ୍ଦିରକୁ ଯାଇ ଭଜନ-କୀର୍ତ୍ତନ ଆରମ୍ଭ କରିଥିଲେ। ଏହି ଘଟଣା ଏବେ ଚର୍ଚ୍ଚାର ବିଷୟ ହୋଇଛି।