ଫୁଲବାଣୀ: ଜଙ୍ଗଲକୁ ଝାଡୁ ସଂଗ୍ରହ କରିବାକୁ ଯାଇଥିବା ମହିଳା ମୁଣ୍ଡରେ ଗୁଳି ବାଜି ଗୁରୁତର ଆହତ ହୋଇଥିବା ଜଣାପଡିଛି । ସୂଚନାଯୋଗ୍ୟ ଖଜୁରିପଡା ଥାନା ଅନ୍ତର୍ଗତ ଛଂଦୁରୁ ପଦର ଗ୍ରାମର ପବିତ୍ର କଁହର ଓ ଜୟନ୍ତୀ କଁହର ସ୍ୱାମୀ ସ୍ତ୍ରୀ ଦୁଇ ଜଣ ନିକଟସ୍ଥ ରଂଜାକୁମ୍ପା ଜଙ୍ଗଲକୁ ଝାଡୁ ସଂଗ୍ରହ କରିବାକୁ ଯାଇଥିଲେ । ଝାଡୁ ସଂଗ୍ରହ କରି ଘରକୁ ଫେରୁଥିବା ବେଳେ ଜଙ୍ଗଲ ଭିତରୁ ଗୋଟିଏ ଗୋଳି ଆସି ପବିତ୍ର କହଁରଙ୍କର ସ୍ତ୍ରୀ ଜୟନ୍ତୀ କହଁରଙ୍କର ମୁଣ୍ଡରେ ବାଜିଥିଲା । ଘଟଣା ସମ୍ପର୍କରେ ଖଜୁରିପଡା ଥାନା ପୋଲିସ ଖବର ପାଇ ଘଟଣା ସ୍ଥଳରେ ପହଞ୍ଚି ଗୁରୁତର ଆହତ ହୋଇଥିବା ଜୟନ୍ତୀ କହଁରକୁ ପୋଲିସ ଆମ୍ବୁଲାନ୍ସ ଯୋଗେ ଆଣି ଚିକିତ୍ସା ନିମନ୍ତେ ଫୁଲବାଣୀ ବଡ଼ ମେଡ଼ିକାଲରେ ଭର୍ତ୍ତି କରିଥିଲେ । ସେଠାରେ ଜୟନ୍ତୀ କହଁରଙ୍କର ଅବସ୍ଥା ସଂକଟାପନ୍ନ ହେବାରୁ ବ୍ରହ୍ମପୁର ବଡ ମେଡ଼ିକାଲକୁ ସ୍ଥାନାନ୍ତର କରାଯାଇଥିବା ପୋଲିସ ସୂଚନା ଦେଇଥିଲା । ତତ ସହିତ ଜଙ୍ଗଲରେ ବନ୍ୟ ଜନ୍ତୁ ଶିକାର କରୁଥିବା ଶିକାରୀର ଗୁଳି ନା ଅନ୍ୟ କେହି ଦୁର୍ବୃତ୍ତର ଗୁଳି ଜୟନ୍ତୀର ମୁଣ୍ଡରେ ବାଜିଛି ବୋଲି ସନ୍ଦେହ କରି ପୋଲିସ ଏକ ମାମଲା ରୁଜୁ କରି ଆସାମୀକୁ ଶୀଘ୍ର ଧରିବା ନିମନ୍ତେ ତଦନ୍ତ ଜାରି ରଖିଥିବା ଫୁଲବାଣୀ ଏସଡିପି ଓ ମହେନ୍ଦ୍ର ନାଥ ମୁର୍ମୁ ଗଣମାଧ୍ୟମକୁ ସୂଚନା ଦେଇଥିଲେ ।