ବାଲିଗୁଡ଼ା: ଦିବା ଆଲୋକରେ ମୋଟରସାଇକେଲ ଚୋରି କରି ନେଇଯାଉଥିବା ବେଳେ ସ୍ଥାନୀୟ ଲୋକଙ୍କ ସହାୟତାରେ ସମ୍ପୃକ୍ତ ଚୋରକୁ କାବୁ କରିବାସହ ମୋଟରସାଇକେଲ ଉଦ୍ଧାର କରିଛି ବାଲିଗୁଡ଼ା ପୋଲିସ୍ । ଘଟଣା ପ୍ରକାରେ ଆଜି ଅପରାହ୍ନ ସମୟରେ କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ପଣଷପଡ଼ି ସାହି ଅଞ୍ଚଳର ଜଣକ ଘରେ କେହି ନଥିବାର ସୁଯୋଗ ନେଇ ତାଙ୍କ ଘର ବାରଣ୍ଡାରେ ଥିବା ପଲସର ମୋଟରସାଇକେଲଟିକୁ ଜଣେ ଯୁବକ ଚୋରୀ କରି ନେବାକୁ ଚେଷ୍ଟା କରିଥିଲେ । ପ୍ରଥମେ କୌଶଳକ୍ରମେ ଘର ହତା ଭିତରୁ ମୋଟରସାଇକେଲଟିକୁ ବାହାରକୁ ଆଣି ଏକ କଇଁଚି ଦ୍ୱାରା ମୋଟରସାଇକେଲ ଷ୍ଟାର୍ଟ କରିବାକୁ ଉଦ୍ୟମ କରିଥିଲା । ଷ୍ଟାର୍ଟ ନହେବାରୁ ମୋଟରସାଇକେଲକୁ ଗଡେଇଗଡେଇ ନେବାବେଳେ କିଛି ସ୍ଥାନୀୟ ଲୋକେ ଦେଖି ତାକୁ ପଚରାଉଚରା କରିଥିବା ବେଳେ ସମ୍ପୃକ୍ତ ଯୁବକ ଜଣକ ମୋଟରସାଇକେଲ ଚୋରୀ କରି ନେଉଥିବା ସନ୍ଦେହ କରି ବାଲିଗୁଡ଼ା ପୋଲିସକୁ ଖବର ଦେଇଥିଲେ । ଖବରପାଇ ପୋଲିସ ଘଟଣାସ୍ଥଳରେ ପହଁଚି ସମ୍ପୃକ୍ତ ଚୋରକୁ ନିଜ ହେପାଜତକୁ ନେବାସହ ମୋଟରସାଇକେଲ ଜବତ କରିଛି ଏବଂ ଅଧିକ ତଦନ୍ତ ଆରମ୍ଭ କରିଥିବା ଜଣାପଡ଼ିଛି ।
