ଖପ୍ରାଖୋଲ,୬/୧୦: ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଲକ ସ୍ଥାନୀୟ ବସ ଷ୍ଟପ, ବ୍ଲକ ଛକ, ଥାନା ଛକ ଓ ବସ୍ତି ଭିତରେ ଚୋରି, ରାହାଜାନୀ ଓ ଅସାମାୟିକ କାର୍ଯ୍ୟକଳାପ ରୋକିବା ପାଇଁ ସିସିଟିଭି କ୍ୟାମେରା ବୁଧବାର ଦିନ ଲଗାଯାଇଛି । ମିଲିଥବା ସୂଚନା ମୁତାବକ ଖପ୍ରାଖୋଲ ଅଞ୍ଚଳରେ ବିଗତ କିଛିଦିନ ହେବ ବାଇକ୍ଚୋରି, ବ୍ୟାଙ୍କ ଡକାୟତି ଓ ଅନ୍ୟାନ୍ୟ ବେଆଇନ କାର୍ଯ୍ୟ ବଢିବାରେ ଲାଗିଛି । ତେଣୁ ଏସବୁକୁ ଖପ୍ରାଖୋଲ ସରପଞ୍ଚ ବେଟିଖାଇ ସେନ୍ଦ୍ରିଆ ଦୃଷ୍ଟିରେ ରଖି ଅଞ୍ଚଳର ଲୋକଙ୍କୁ ସୁରକ୍ଷା ଦେବା ପାଇଁ ପଞ୍ଚାୟତ ତରଫରୁ ସିସିଟିଭି କ୍ୟାମେରା ଲଗାଯାଇଥିବା ପ୍ରକାଶ କରିଛନ୍ତି । ସିସିଟିଭି ଲାଗିବା ପରେ ଅଞ୍ଚଳରେ ବେଆଇନ କାର୍ଯ୍ୟ ରୋକାଯାଇପାରିବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି ।
