ଭୁବନେଶ୍ୱର : ଆମେରିକାର ଚିକାଗୋ ସହରରୁ ଭୁବନେଶ୍ୱର ସ୍ଥିତ ଆନ୍ତର୍ଜାତୀୟ ବିମାନବନନ୍ଦରକୁ ବିମାନ ଆସିବ । ବନ୍ଦେ ଭାରତ ମିଶନ-୨ ଅଭିଯାନରେ ଏୟାର ଇଣ୍ଡିଆର ଏହି ବିମାନ ଚିକାଗୋ ସହରରୁ ଆମେରିକାରେ ଫଶି ରହିଥିବା ପ୍ରବାସୀ ଭାରତୀୟଙ୍କୁ ଆଣି ଆସିବ । ଆସନ୍ତା ୧୬ ତାରିଖରୁ ୨୨ ତାରିଖ ମଧ୍ୟରେ ଏହି ବିମାନ ଆସିବାକୁ ଥିବା ବେଳେ କେଉଁ ନିର୍ଦ୍ଦିଷ୍ଟ ଦିନ ଏହା ଆସିବ ସେ ସଂପର୍କରେ କାର୍ଯ୍ୟସୂଚୀ ପ୍ରସ୍ତୁତ ହୋଇନାହିଁ । ଚିକାଗୋରୁ ଦିଲ୍ଲୀ ଦେଇ ଏହି ସ୍ୱତନ୍ତ୍ର ବିମାନ ଆସିବ ବୋଲି ଜଣାପଡିଥିବା ବେଳେ ଆସନ୍ତା ୧୯ ତାରିଖରେ ଅନ୍ୟ ଏକ ବିମାନ ଦୁବାଇରୁ, ୨୦ ତାରିଖରେ କ୍ୱାଲାଲାମପୁରରୁ ଭୁବନେଶ୍ୱରକୁ ୨ଟି ବିମାନ ଆସିବ । ବିଦେଶୀରେ ଫଶି ରହିଥିବା ଭାରତୀୟଙ୍କ ପାଇଁ କେନ୍ଦ୍ର ସରକାରଙ୍କ ପକ୍ଷରୁ କରାଯାଇଥିବା ବ୍ୟବସ୍ଥାରେ ଏହି ପ୍ରବାସୀ ଭାରତୀୟମାନେ ଭୁବନେଶ୍ୱର ଆସିବେ । ଉଲ୍ଲେଖଯୋଗ୍ୟ ଯେ, ଏହି ଅଭିଯାନର ଦ୍ୱିତୀୟ ପର୍ଯ୍ୟାୟ ୧୬ ତାରିଖରୁ ୨୨ ତାରିଖ ପର୍ଯ୍ୟନ୍ତ ଚାଲିଥିବାକୁ ଥିବା ବେଳେ ୩୧ଟି ଦେଶରୁ ୧୧୪ଟି ବିମାନରେ ସମସ୍ତ ପ୍ରବାସୀ ଭାରତୀୟ ସ୍ୱଦେଶ ଫେରିବେ ।
