ଦାରିଙ୍ଗବାଡ଼ି,୧୦/୩ :କନ୍ଧମାଳ ଜିଲ୍ଲା ରାଇକିଆ ବ୍ଲକ ବେଲକଟି ଗ୍ରାମରେ ଆଜି ଏକ ଦୁଃଖଦ ଘଟଣା ଘଟିଯାଇଛି I ଗ୍ରାମରେ ଥିବା ପ୍ରାଥମିକ ବିଦ୍ୟାଳୟର ଫାଟକ ଭାଙ୍ଗି ଭୁଶୁଡ଼ି ଯିବାରୁ ସେଥିରେ ଚାପି ହୋଇଯାଇ ଜଣେ ଛାତ୍ରୀଙ୍କ ମୃତ୍ୟୁ ଘଟି ଥିବା ବେଳେ ଜଣେ ଛାତ୍ରୀ ଏବଂ ଜଣେ ଛାତ୍ର ଗୁରୁତ୍ୱର ଆହତ ହୋଇଛନ୍ତି Iମିଳିଥିବା ସୂଚନା ପ୍ରକାରେ ଆଜି ପୂର୍ବାହ୍ନ ପ୍ରାୟ ସମୟରେ ସେହି ଗ୍ରାମର ସଂଜୀବ ପ୍ରଧାନଙ୍କ ଝିଅ ଶିଖା ପ୍ରଧାନ(୮), ଜମ୍ବେଦ ପ୍ରଧାନଙ୍କ ଝିଅ ଶୁଭଶ୍ରୀ ପ୍ରଧାନ(୭) ଏବଂ ଭୀମସେନ ପ୍ରଧାନଙ୍କ ପୁଅ ରିତେଶ ପ୍ରଧାନ(୮) ପ୍ରାଥମିକ ବିଦ୍ୟାଳୟର ଫାଟକରେ ଖେଳୁ ଥିଲେ Iଏହି ସମୟରେ ହଠାତ ଫାଟକ ତାଙ୍କ ଉପରେ ଭୁଶୁଡି ପଡ଼ି ଥିଲା I ଫାଟକ ଏବଂ ଇଟା ତଳେ ତିନି ଜଣ ଛାତ୍ର ଛାତ୍ରୀ ଚାପି ହୋଇ ରହି ଯାଇଥିଲେ I ଏହା ଦେଖି ସ୍ଥାନୀୟ ଲୋକ ତୁରନ୍ତ ସେଠାରେ ପହଞ୍ଚି ତିନି ଜଣ ଛାତ୍ର ଛାତ୍ରୀଙ୍କୁ ଉଦ୍ଧାର କରି ଗୁରୁତ୍ୱର ଅବସ୍ଥାରେ ଘୁ.ଉଦୟଗିରି ଗୋଷ୍ଠିସ୍ୱାସ୍ଥ୍ୟ କେନ୍ଦ୍ରକୁ ଆଣି ଥିଲେ I ତେବେ ସେଠାରେ ଡାକ୍ତର ଛାତ୍ରୀ ଶିଖା ପ୍ରଧାନ(୮)ଙ୍କୁ ମୃତ ଘୋଷଣା କରିଥିଲେ I ଅନ୍ୟ ଦୁଇ ଗୁରୁତର ଆହତ ଛାତ୍ରଛାତ୍ରୀଙ୍କୁ ଫୁଲବାଣୀ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତରିତ କରା ଯାଇଥିଲା I ମୃତ ଛାତ୍ରୀଙ୍କ ମୁଣ୍ଡରେ ଗଭୀର କ୍ଷତ ହେବାରୁ ପ୍ରବଳ ରକ୍ତ ଶ୍ରାବ ହୋଇଥିଲା I ଅନ୍ୟ ଦୁଇ ଗୁରୁତର ଆହତ ଛାତ୍ରଙ୍କଛାତ୍ରୀ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗି ଥିବା ସ୍ୱାସ୍ଥ୍ୟକେନ୍ଦ୍ର ପକ୍ଷରୁ ସୂଚନା ମିଳିଛି I ଘଟଣା ପରେ ଗ୍ରାମରେ ଶୋକର ଛାୟା ଖେଳିଯାଇଛି ।
