ବାଲିଗୁଡ଼ା: ପାର୍ବଣ ଋତୁରେ କନ୍ଧମାଳ ଜିଲ୍ଲା ଘୁ.ଉଦୟଗିରି ଅଞ୍ଚଳରେ ଜୁଆ ଖେଳ ବଢ଼ିବାରେ ଲାଗିଛି । ଏହାକୁ ନେଇ ଜୁଆ ଆଡ୍ଡାରେ ଚଢ଼ାଉ ଜାରିରଖିଛି ଜି.ଉଦୟଗିରି ପୋଲିସ । ଗତ ଦୁଇଦିନ ମଧ୍ୟରେ ଜି.ଉଦୟଗିରିର ହୋଟେଲ ଦିଶା ଓ ଦଣ୍ଡପାଣି ଲର୍ଜ ଉପରେ ପୁଲିସ ଚଢ଼ାଉ କରି ଦୁଇଟି ସ୍ଥାନରୁ ନଗଦ ଏକ ଲକ୍ଷ ୭୫ହଜାର ୩୫୦ଟଙ୍କା ଜବତ କରିବାସହ ୧୩ଜଣ ଜୁଆଡ଼ିଙ୍କୁ ଗିରଫ କରିଛି ପୋଲିସ । ସୂଚନା ପ୍ରକାରେ ଜି.ଉଦୟଗିରି ଥାନା ଅଞ୍ଚଳର ବିଭିନ୍ନ ସ୍ଥାନରେ ଜୁଆ ଆଡ୍ଡା ଚାଲିଥିବାର କୌଣସି ସୂତ୍ରରୁ ପୁଲିସ ଖବର ପାଇଥିଲା । ପୂର୍ବ ପ୍ରସ୍ତୁତି ଅନୁଯାୟୀ ଥାନା ଅଧିକାରୀ ନରେଶ କୁମାର ସାହୁ ଜୁଆ ଆଡ୍ଡାରେ ଅଚାନକ ଚଢ଼ାଉ କରିଥିଲେ । ଅଞ୍ଚଳରେ ଜୁଆ ଆଡ୍ଡା ବନ୍ଦ କରାଇବା ଲକ୍ଷ୍ୟରେ ଆମର ଏହି ପ୍ରୟାସ । ଆଗାମୀ ଦିନରେ ମଧ୍ୟ ଏଭଳି ଚଢ଼ାଉ ଜାରି ରହିବ ବୋଲି କହିଛନ୍ତି ଥାନା ଅଧିକାରୀ ନରେଶ କୁମାର ସାହୁ ।
