କ’ଣ କହୁଛି ବୌଦ୍ଧ ସିଡିଏମଓଙ୍କ ଚିଠି : ସମ୍ କୋଭିଡ ହସ୍ପିଟାଲକୁ ବାଇକରେ ନା ଆମ୍ବୁଲାନସରେ ଗଲେ କରୋନା ଆକ୍ରାନ୍ତ !
ବୌଦ୍ଧ :- ବୌଦ୍ଧଜିଲ୍ଲାରେ ୩ଜଣଙ୍କ ନିକଟରେ କରୋନା ପୋଜିଟିଭ ରିପୋର୍ଟ ସନ୍ଧ୍ୟାରେ ଆସିବାପରେ ପ୍ରଶାସନ ତତ୍ପର ହୋଇ ଉଠିଥିଲା । ଆକ୍ରାନ୍ତମାନେ ଥିବା ଜଗତି କ୍ୱାରେଣ୍ଟାଇନ ସେଣ୍ଟରର ସୁରକ୍ଷା ବ୍ୟବସ୍ଥା ବଢାଯିବାସହ ୩ ଆକ୍ରାନ୍ତଙ୍କୁ ଭୁବନେଶ୍ୱରସ୍ଥିତ ସମ୍ କୋଭିଡ ହସ୍ପିଟାଲକୁ ପଠାଇବାର ବ୍ୟବସ୍ଥା କରାଯାଇଥିଲା । ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ଲକ୍ଷ୍ମୀଧର ସାହୁ ରୋଗୀମାନଙ୍କୁ ରେଫର କରିଥିଲେ ସମ୍ ହସପିଟାଲର ଅଧୀକ୍ଷକଙ୍କ ନିକଟକୁ ଅଧିକ ଚିକିତ୍ସା ପାଇଁ । ସେହି ଚିଠି ଯେଉଁଥିରେ କି ଉଲ୍ଲେଖ ଥିଲା ଆମ୍ବୁଲାନ୍ସ ଗାଡି ନଂ ଓଡି-୧୫ଏମ୫୨୬୨ରେ ରୋଗୀମାନେ ଯାଉଥିବାର ସୂଚନା । ସେହି ଆମ୍ବୁଲାନସକୁ ପୋଲିସ ଏସକର୍ଟରେ ନେବାପାଇଁ ବୌଦ୍ଧ ଏସପିଙ୍କୁ ମଧ୍ୟ ନକଲ ଦେଇଛନ୍ତି ।
ସୂଚନା ଓ ପ୍ରଯୁକ୍ତିର ପ୍ରସାର ପରେ କେଉଁକଥା କାହାକୁ ଅଛପା ବୋଲି କିଛିନାହିଁ । ଲୋକେ ମୋବାଇଲ ସାହାଯ୍ୟରେ ଆମ୍ବୁଲାନ୍ସ ନମ୍ବରକୁ ସର୍ଚ୍ଚକଲେ ସରକାରଙ୍କ ବାହାନ ପୋର୍ଟାଲରେ । ଯେଉଁ ଗାଡିରେ ୩ଜଣ ରୋଗୀ ଓ ସ୍ୱାସ୍ଥ୍ୟ ସହାୟକମାନେ ଯାଇଛନ୍ତି ଅର୍ଥାତ ସିଡିଏମଓ ବୌଦ୍ଧଙ୍କ ଚିଠି ଅନୁଯାୟୀ ଗାଡି ନଂ ଓଡି୧୫ଏମ୍୫୨୬୨ ଏକ ବାଇକ (ପ୍ଲାଟିନା-୧୦୦)ର ପଞ୍ଜିକରଣ ନମ୍ବର ଅଟେ । ବାହାନ ପୋର୍ଟାଲର ରିପୋର୍ଟ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଲା । ବୌଦ୍ଧ ସ୍ୱାସ୍ଥ୍ୟ ବିଭାଗର ତ୍ରୁଟି ଓ ଅପାରଗତାକୁ ନେଇ ଲୋକେ ମନ୍ତବ୍ୟ ଦେବାରେ ଲାଗିଲେ ।
ସିଡିଏମଓଙ୍କ କାର୍ଯ୍ୟାଳୟରେ ଯେଉଁ ଅଧିକାରୀମାନେ ଚିଠି ପ୍ରସ୍ତୁତ କରିଛନ୍ତି କାର୍ଯ୍ୟକରିବାରେ ସେମାନଙ୍କର ପାରଦର୍ଶିତା ଉପରେ ଏୂବେ ପ୍ରଶ୍ନବାଚୀ ସୃଷ୍ଟି କରୁଛି । ଦେଶରେ କରୋନାଭଳି ମହାମାରୀ ବ୍ୟାପିଥିବାବେଳେ ସିଡିଏମଓ ଆଖିବୁଜି ସ୍ୱାକ୍ଷର କରିବା ତାଙ୍କର ଖାମଖିଆଲି ମନୋଭାବକୁ ସ୍ପଷ୍ଟ କରୁଛି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି । ଚିଠିରେ ଆମ୍ବୁଲାନସ ନମ୍ବର ବଦଳରେ ଏକ ବାଇକ ନମ୍ବର ପଡିଥିବା ଘଟଣାକୁ ନେଇ କରୋନା କାମରେ ନିୟୋଜିତ ସରକାରୀ ଅଧିକାରୀ ମାନଙ୍କର ନିଷ୍ଠା, ଆଗ୍ରହ ଓ ପାରଦର୍ଶିତାକୁ ଜନସାଧାରଣରେ ଭିନ୍ନଭିନ୍ନ ଆଲୋଚନାର ଖୋରାକ ଯୋଗାଇଛି । ଏନେଇ ସିଡିଏମଓ ଡା. ସାହୁଙ୍କୁ ପଚାରିବାରୁ ସେ କହିଥିଲେ ଗତକାଲି ତରବରରେ ଚିଠି କରିବା ଭିତରେ ଗାଡି ନଂ ଭୁଲରେ ଟାଇପ ହୋଇଥିବ ମୁଁ ଅଫିସକୁ ଗଲେ ଅନୁଧ୍ୟାନ କରିବି ।
