ସମ୍ବଲପୁର : ଯୁବପିଢିକୁ ଉଦଭ୍ରମିତ କରିବା ପାଇଁ ଏଠାରେ ଧଳା ବିଷ ବ୍ରାଉନ ସୁଗରର ଚୋରା ବେପାର କାୟାବିସ୍ତାର କରିବା ଚିନ୍ତାର ବିଷୟ ହେଲାଣି । ଗତକାଲି ସ୍ଥାନୀୟ ରେଙ୍ଗାଲି ଥାନା ଅନ୍ତର୍ଗତ ନ୍ୟୁ ରାମ୍ପେଲଠାରେ ପୁଲିସ ତିନି ଜଣଙ୍କୁ ଗିରଫ କରିବା ସହିତ ସେମାନଙ୍କଠାରୁ ୫ଲକ୍ଷ ଟଙ୍କା ନଗଦ ଓ ଦୁଇଟି ପ୍ୟାକେଟରେ ୬୨ଗ୍ରାମ ବ୍ରାଉନସୁଗର ଜବତ କରିଛି । ଯାହାର ଆନୁମାନିକ ମୂଲ୍ୟ ୪ ଲକ୍ଷ ଟଙ୍କାରୁ ଅଧିକ ବୋଲି କୁହାଯାଉଛି । ସେମାନଙ୍କୁ ଆଜି ବିଚାର ବିଭାଗୀୟ ହାଜତକୁ ପଠାଯାଇଛି ।
ଏ ସମ୍ପର୍କରେ ଜିଲ୍ଲା ପୁଲିସ ସୂତ୍ରରୁ ପ୍ରାପ୍ତ ଏକ ପ୍ରେସ ବାର୍ତ୍ତା ଅନୁସାରେ ଉକ୍ତ ତିନିଜଣ ଅଭିଯୁକ୍ତଙ୍କଠାରୁ ଏକ ଧଳା ହୋଣ୍ଡା ସିଟି କାର, ଓଡି ୦୨ ବିକ୍ୟୁ ୭୭୭୫ ସହିତ ଚାରୋଟି ମୋବାଇଲ ଫୋନ ମଧ୍ୟ ଜବତ କରାଯାଇଛି । ସ୍ଥାନୀୟ ରେଙ୍ଗାଲି ଥାନାରେ ଗତକାଲି କେସ କ୍ରମାଙ୍କ ୧୦୧/୦୬.୦୬.୨୦୨୧ ରେ ଏକ ମାସେ ରୁଜୁ କରିବା ସହ ଭାରତୀୟ ଦଣ୍ଡବିଧି ଧାରା ୨୧(ବି) ଓ ୨୯ ଏନଡିପିଏସ ଆକ୍ଟ ଅନ୍ତର୍ଗତ ଅପରାଧ କାୟମ କରାଯାଇ ତଦନ୍ତ କରାଯାଉଛି । ଏଠାରେ ଉଲ୍ଲେଖଯୋଗ୍ୟ ଯେ ଏହା ପୂର୍ବରୁ ଗତ ଏପ୍ରିଲ ୭ ତାରିଖରେ ଏହିପରି ଏକ ମାମଲା ରୁଜୁ କରିବା ସହିତ ତିନିଜଣଙ୍କୁ ଗିରଫ କରାଯାଇଥିଲା ।
