ଦାରିଙ୍ଗବାଡି : ଟ୍ରାକ୍ଟର ଓଲଟି ଯିବାରୁ ଦୁଇଜଣ ବ୍ୟକ୍ତି ଗୁରୁତର ଆହତ ହୋଇଥିବା ବେଳେ ୫ ଯୁବକ ସାମାନ୍ୟ ଆହତ ହୋଇଛନ୍ତି । ଘଟଣା ଘଟିଛି ଦାରିଙ୍ଗବାଡି ଥାନା ସିଜିଗାଣ୍ଡା ଘାଟିରେ । ଅନାମ ପ୍ରଧାନ,ସୂର୍ଯ୍ୟ ପ୍ରଧାନ,ଦାନୀଏଲ ପ୍ରଧାନ,ସାଗର ନାୟକ,ରୋଶନ ନାୟକ ସାମାନ୍ୟ ଆହତ ହୋଇଥିବା ବେଳେ ଡାଲାଗାଡୁ ଗ୍ରାମର କୀର୍ତ୍ତନ ଉଠାନସିଂ(୩୪) ଓ ସେଲେନସ୍ତିନା ନାୟକଙ୍କୁ (୪୬) ଗୁରୁତର ଆହତ ହୋଇଛନ୍ତି । ଦୁଇ ଜଣଙ୍କୁ ପ୍ରାଥମିକ ଚିକିତ୍ସା କରାଯାଇ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ରେଫର କରାଯାଇଛି । ଆହତ ୫ ଜଣ ଯୁବକ ଦାରିଙ୍ଗବାଡି ମେଡିକାଲରେ ଚିକିତ୍ସିତ ହେଉଛନ୍ତି । ସୂଚନା ଅନୁଯାୟୀ ଛଡ଼ାକିଆ ଗ୍ରାମରୁ ରାସନ ଚାଉଳ ନେଇ ଟ୍ରାକ୍ଟର ଯୋଗେ ଡାଲାଗାଡୁ ଗ୍ରାମକୁ ୧୩ ଜଣ ଯୁବକ ଚାଉଳ ଆଣିବାକୁ ଯାଇଥିଲେ । ହେଲେ ବାଟରେ ଟ୍ରାକ୍ଟରଟି ଭାରସାମ୍ୟ ହରାଇ ସିଜିଗାଣ୍ଡା ଘାଟିରେ ଓଲଟି ପଡ଼ିଥିଲା । ଯାହାରି ଫଳରେ ୧୩ ଜଣଙ୍କ ମଧ୍ୟରୁ ୨ ଜଣ ଗୁରୁତର ଆହତ ହୋଇଥିବା ବେଳେ ୫ ଜଣ ଯୁବକ ସାମାନ୍ୟ ଆହତ ହୋଇଛନ୍ତି । ଦାରିଙ୍ଗବାଡି ପୋଲିସ ଘଟଣା ସ୍ଥଳେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡ଼ିଛି ।
