ସୁବର୍ଣ୍ଣପୁର : ସୁବର୍ଣ୍ଣପୁର ଜିଲ୍ଳା ବିନିକା ଥାନା ଅରିଗାଁଠାରେ ଘଟିଛି ଏକ ମର୍ମନ୍ତୁଦ ସଡକ ଦୁର୍ଘଟଣା । ଏକ ହାଇୱା ଧକ୍କାରେ ୩ ଜଣ ମୃତ ହୋଇଥିବା ଜଣେ ୧ ଗୁରୁତର ହୋଇଛନ୍ତି । ବରଗଡ଼ ଜିଲ୍ଲା ଭେଡେନ ଥାନା ବଏପୁର ଗାଁରୁ ଝିଅ ଦେଖିବା ପାଇଁ ବିନିକା ଥାନା ବଲାରଙ୍ଗା ଗ୍ରାମକୁ ଆସିଥିଲେ । ଝିଅ ଦେଖି ଫେରିବା ବେଳେ ଅରିଗାଁ ଠାରେ ପାଣି ପିଇବା ପାଇଁ ଅଟକିଥିଲେ । ତେବେ ଗୋଡ଼ଭଗା ପଟରୁ ଏକ ହାଇୱା ଦ୍ରୁତ ଗତିରେ ଆସୁଥିବା ବେଳେ ଏମାନଙ୍କ ଉପରକୁ ହଠାତ ମାଡିଆସିଥିଲା । ସ୍ଥାନୀୟ ଲୋକମାନେ ଆହତ ସମସ୍ତଙ୍କୁ ଉଦ୍ଧାର କରି ବିନିକା ମୁଖ୍ୟ ଡାକ୍ତରଖାନା ରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ତିନି ଜଣଙ୍କୁ ମୃତ ଘୋଷଣା କରିଥିବା ବେଳେ ଗୁରୁତର ଥିବା ଜଣକୁ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଡାକ୍ତରଖାନା କୁ ସ୍ଥାନାନ୍ତରିତ କରାଯାଇଛି । ମୃତକ ମାନେ ହେଲେ ଭେଡେନ ଥାନା ବାଏପୁର ଗାଁ ର ଗୌର ମାଝୀ, ଗୋବିନ୍ଦ ବଗର୍ତ୍ତି, ଜନାର୍ଦ୍ଦନ ବାରିକ ଓ ଆହତ ବ୍ୟକ୍ତି ହେଲେ ରୂପାପାଲି ଗାଁର ବରୁଣ ଭୋଇ ବୋଲି ଜଣାପଡିଛି । ବିନିକା ପୋଲିସ ଘଟଣା ସ୍ଥଳରେ ହାଇୱା ଜବତ କରିବା ସହ ଚାଳକଙ୍କୁ ଅଟକ ରଖି ତଦନ୍ତ ଜାରି ରଖିଛି ।
