ବୌଦ୍ଧ : ବଲାସିଙ୍ଗାଠାରେ ଥିବା ପଞ୍ଚମ ଆଇ.ଆର.ବି. ବାଟାଲିୟନର ଓଡ୍ରାଫ ୟୁନିଟର ଯବାନ ମାନେ ଆଜି ବଉଦ ମହାନଦୀର ଅପରପାର୍ଶ୍ୱରେ ମକଡ୍ରିଲ୍ କରୁଥିବା ବେଳେ ପାଣିରେ ବୁଡି ଜଣେ ଯବାନ ମୃତ୍ୟୁବରଣ କରିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଓଡ୍ରାଫ ୟୁନିଟର ଯବାନମାନେ ଆଜି ମକଡ୍ରିଲ୍ କରୁଥିବା ବେଳେ ପଞ୍ଚମ ଆଇଆରବିର ଜଣେ ଯବାନ ମହାନଦୀରେ ନିଖୋଜ ହୋଇ ଯାଇଥିଲେ ।
ବୌଦ୍ଧ ଦମକଳ ବାହିନୀ, ଓଡ୍ରାଫ ୟୁନିଟ, ପୋଲିସ୍ ଓ ଆଇଆରବି ଯବାନ ମାନେ ଦୁଇ ଘଣ୍ଟାର ପରିଶ୍ରମ ପରେ ମହାନଦୀ ଜଳରୁ ଯବାନଙ୍କ ମୃତ ଶରୀର ଉଦ୍ଧାର କରିଥିଲେ । ମୃତ ଯବାନଙ୍କ ନାମ ପ୍ରଦ୍ୟୁମ୍ନ ପଣ୍ଡା (୩୧ ବର୍ଷ )ଓ ନିଜ ଘର ଫୁଲବାଣୀ ସହର ପିଅନପଡାରେ ବୋଲି ଜଣାପଡିଛି ।
ମହାନଦୀରୁ ମୃତ ଶରୀର ଉଦ୍ଧାର ପରେ ପୋଷ୍ଟ ମୋଟମ ପାଇଁ ବୌଦ୍ଧ ଡାକ୍ତରଖାନାକୁ ଅଣାଯାଇଥିଲା । ସୂଚନା ପାଇ ତାଙ୍କ ପରିବାରବର୍ଗ ବୌଦ୍ଧ ଡାକ୍ତରଖାନାରେ ପହଞ୍ଚିଥିଲେ । ସହକର୍ମୀ, ପରିବାର ଓ ବନ୍ଧୁବର୍ଗ ମଧ୍ୟରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
