ସମ୍ବଲପୁର : କରୋନା କଟକଣା ନାଁ ରେ ବାରମ୍ବାର ଲକଡାଉନ ଓ ସଟଡାଉନ ପାଇଁ ଅଧିକାଂଶ ଲୋକମାନେ ଅତିଷ୍ଠ ହେଲାପରି ପ୍ରତିକ୍ରିୟା ଦେଇଥାନ୍ତି, ଯଦିଓ ଏହା ଦ୍ୱାରା ସେମାନେ ସୁରକ୍ଷିତ ରହୁଛନ୍ତି । ଲୋକଙ୍କ ଏହିପରି ଅଧୈର୍ଯ୍ୟ ଓ ଅସହିଷ୍ଣୁ ହେବାର ଚାକ୍ଷୁଷ ପ୍ରମାଣ ଆଜି ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦେଖିବାକୁ ମିଳିଛି, ଯାହାକି କୌଣସି ବିଡମ୍ବନା ଠାରୁ କିଛି ଊଣା ନୁହେଁ । କଟକଣା କୋହଳ ହେବାର ଆଜି ହେଉଛି ପ୍ରଥମ ଦିନ ଓ ବର୍ତ୍ତମାନ ଶୀତଳଷଷ୍ଠୀ ଯାତ୍ରା ପରିପ୍ରେକ୍ଷୀରେ ଏହାର ଉଲ୍ଲଘଂନ ହେବା ଆଶଙ୍କା ନେଇ ସମସ୍ତଙ୍କ ଆଖି ମନ୍ଦିର ମାନଙ୍କ ଉପରେ ରହିଛି, ଯଦିଓ ସେଠାରେ ଏପରି କୌଣସି ଅଘଟଣ ଘଟି ନାହିଁ । ଦୁର୍ଭାଗ୍ୟବଶତଃ ଏପରି ଏକ ଘଟଣା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦେଖାଗଲା । ସେଠାରେ ଉପସ୍ଥିତ କିଛି ସାମ୍ବାଦିକ ଏହାର ସୁଯୋଗ ନେଇ ଉକ୍ତ ଏକତ୍ରିତ ଜନଗହଳି ଭିତରେ କିଛି ଲୋକଙ୍କ ଠାରୁ ଏ ବିଷୟରେ ମତାମତ ମଧ୍ୟ ସଂଗ୍ରହ କରିଥିଲେ । ଏଦିଗରେ ଜନସାଧାରଣଙ୍କୁ ଆଉ ଅଧିକ ସଚେତନ କରାଇବାର ଆବଶ୍ୟକତା ଅନୁଭବ କରାଯାଉଛି ।
