ସମ୍ବଲପୁର: ଆଗାମୀ ଦିନରେ ଦୀପାବଳି ରହୁଥିବାରୁ ଏହାପୂର୍ବରୁ ଜୁଆଖେଳର ପ୍ରାଦୁର୍ଭାବ ଯଥେଷ୍ଟ ବଢିଯାଇଛି ଓ ଏହା ବିରୁଦ୍ଧରେ କାର୍ଯ୍ୟାନୁଷ୍ଠାନ ଦିଗରେ ଏଠାକାର ପୁଲିସ ସକ୍ରିୟ ହୋଇ ଯାଇଛି । ଏହି ଶୃଙ୍ଖଳାରେ ଗତକାଲି ସନ୍ଧ୍ୟା ଓ ରାତିରେ ସ୍ଥାନୀୟ କ୍ଷେତରାଜପୁର ପୁଲିସ ଥାନା ଅନ୍ତର୍ଗତ ଦୁଇଟି ସ୍ଥାନରେ ପୁଲିସ ହଠାତ ଚଢ଼ାଉ କରି ସେଠାରେ ଜୁଆଖେଳରେ ମଜ୍ଜି ରହିଥିବା ମୋଟ ୯ ଜଣ ଜୁଆଡିଙ୍କୁ ଗିରଫ କରିବା ସହିତ ଜୁଆଖେଳରେ ଲାଗିଥିବା ୧୦ ହଜାର ୪୦୦ ନଗଦ ଟଙ୍କା ମଧ୍ୟ ଜବତ କରିଛି । ଏହି ସଂକ୍ରାନ୍ତରେ ଉକ୍ତ ଥାନାରେ ଦୁଇଟି ମାମଲା କ୍ରମାଙ୍କ ୨୭୭ ଓ ୨୭୮/୨୦୨୦ ମତେ ରୁଜୁ କରାଯାଇଛି । ଅଭିଯୁକ୍ତଙ୍କ ଚିହ୍ନଟ ପପୁଲୁ ଦାଶ (୨୬), ଆକାଶ ଦାଶ (୨୨), ମଣ୍ଟୁ ଦାଶ (୩୮), ସୁଶି କର୍ମକାର (୪୫), ନିର୍ମଳ ଦତ୍ତ (୪୮), କିଶୋର ଦାଶ (୫୧), ରାଜେଶ ମାଝି (୪୦), ନିତ୍ୟା ଚୌଧୁରୀ (୪୫) ଓ ଗଣେଶ ଦାଶ (୪୦) ରୂପେ କରାଯାଇଛି । ଏହି ସମସ୍ତ ଅଭିଯୁକ୍ତମାନଙ୍କୁ ଆଜି କୋର୍ଟ ଚାଲାଣ କରାଯାଉଛି ବୋଲି ପୁଲିସ ସୂତ୍ରରୁ ପ୍ରକାଶ ।
