ବଲାଙ୍ଗୀର,୨୭/୪- ବଲାଙ୍ଗୀର ଜିଲ୍ଲାରେ ଆଜି ୪୫୭ ଆକ୍ରାନ୍ତ ଚିହ୍ନଟ ହୋଇଥିବାବେଳେ ରାଜ୍ୟରେ ୨ୟ ସ୍ଥାନରେ ରହିଥିବା ସୂଚନା ଓ ଲୋକସମ୍ପର୍କ ବିଭାଗ ତଥ୍ୟରୁ ଜଣାଯାଇଛି । ଦିନକରେ ୩୨୨ ପରେ କମି କମି ୯୮ରେ ପହଞ୍ଚିବା ପରେ ପୁଣି ରେକର୍ଡ ସଂଖ୍ୟକ ୪୫୭ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହା ସହ ଆକ୍ଟିଭ ରୋଗୀ ସଂଖ୍ୟା ମଧ୍ୟ ୨୧୦୦ ଟପିଛି । ଜିଲ୍ଲାର ମୋଟ ଆକ୍ରାନ୍ତ ସଂଖ୍ୟା ୧୨୦୩୮ ଛୁଇଁଥିବାବେଳେ ସୁସ୍ଥ ହୋଇଛନ୍ତି ୯୮୦୦ । ଆଜିର ରିପୋର୍ଟରେ ନୂଆ ଚିହ୍ନଟଙ୍କ ସଂଖ୍ୟା ଦୃଷ୍ଟିରୁ ଖୋର୍ଦ୍ଧା ଜିଲ୍ଲା ପରେ ବଲାଙ୍ଗୀର ଦ୍ୱିତୀୟ ସ୍ଥାନରେ ଅଛି । ମାକ୍ସ ପିନ୍ଧିବା, ସାମାଜିକ ଦୂରତା ରକ୍ଷା ଇତ୍ୟାଦି ନିର୍ଦ୍ଦେଶ ପାଳନ କରିବା ସହ ପ୍ରଶାସନର ସ୍କ୍ରିନିଙ୍ଗ, ଟେଷ୍ଟିଙ୍ଗ ପାଇଁ ସହଯୋଗ କରିବା ନେଇ ସତର୍କତା ଅବଲମ୍ବନ କରିବା ପାଇଁ ବିଭିନ୍ନ ମହଲରୁ ଅନୁରୋଧ କରାଯାଇଛି ।
