ବୌଦ୍ଧ,୫/୭ – ହଠାତ୍ ବାଘନଦୀରେ ବନ୍ୟା ଜଳ ମାଡି ଆସିବାରୁ ଗତକାଲି ଭାସି ଯାଇଥିବା ଟ୍ରାକ୍ଟର ଆଜି ହାଇଡ୍ରା ଯୋଗେ ଉଦ୍ଧାର କରାଯାଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ମନମୁଣ୍ଡା ଥାନା ଶଗଡା ଗ୍ରାମ ପଂଚାୟତର କନପା ଗ୍ରାମ ନିକଟ ଦେବତା ଘାଟରେ ବାଘ ନଦୀ ଉପରେ ବ୍ରିଜ କାମ ପାଇଁ ହୋଇଥିବା ରାସ୍ତାରେ ହଳ ଲଙ୍ଗଳ ଲାଗିଥିବା ଗୋଟିଏ ଟ୍ରାକ୍ଟର ଗତକାଲି ଅପରାହ୍ନ ୪ ଘଣ୍ଟା ସମୟରେ ନଦୀ ପାର ହେଉଥିଲା । କିଛି ସମୟ ପୂର୍ବରୁ ଉପର ମୁଣ୍ଡରେ ବର୍ଷା ହୋଇଥିବା ଯୋଗୁଁ ହଠାତ୍ ବାଘନଦୀରେ ବର୍ଷାଜଳ ମାଡି ଆସିବା ଯୋଗୁଁ ଟ୍ରାକ୍ଟରଟି ବୁଡି ଯାଇଥିଲା ଓ ଡ୍ରାଇଭର କୌଣସି ପ୍ରକାରେ କୂଳକୁ ଚାଲି ଆସିଥିଲେ । ଆଜି ଜଳସ୍ତର କମିବା ପରେ ଗୋଟିଏ ହାଇଡ୍ରା ଯୋଗେ ଟ୍ରାକ୍ଟରକୁ ନଦୀ ଜଳରୁ ଉଦ୍ଧାର କରାଯାଇଥିବା ଜଣାପଡିଛି ।
