ବୌଦ୍ଧ,୫/୧୧ – ଆଜି ପୁଣି ନୂତନ ଭାବରେ ୪ଜଣ କରୋନା ପଜିଟିଭ ଚିହ୍ନଟ ହୋଇଥିବା ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ସୂଚନା ଦିଆଯାଇଛି । ପୂର୍ବରୁ ବୌଦ୍ଧ ଜିଲ୍ଲାରେ ୨୬୧୦ ଜଣ କରୋନା ପଜିଟିଭ ଚିହ୍ନଟ ହୋଇଥିବା ବେଳେ ପୁଣି ନୂତନ ୪ ଆକ୍ରାନ୍ତ ଚିହ୍ନଟ ହେବା ପରେ ଜିଲ୍ଲାରେ ମୋଟ କରୋନା ପଜିଟିଭ ସଂଖ୍ୟା ୨୬୧୪ ରେ ପହଞ୍ଚିଛି । ସିଡିଏମଓ ଡାକ୍ତର ତ୍ରିଲୋଚନ ପ୍ରଧାନଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଆଜି ଚିହ୍ନଟ ହୋଇଥିବା ଆକ୍ରାନ୍ତମାନେ ହେଲେ କଣ୍ଟାମାଳ ବ୍ଲକ୍ ଜାଲପାଲି ଗ୍ରାମରୁ ୧ ଜଣ, କପାସିରା ଗ୍ରାମରୁ ୧ ଜଣ, କଣ୍ଟାମାଳ ଗ୍ରାମରୁ ୧ ଜଣ ଓ ବୌଦ୍ଧବ୍ଲକ୍ ସାନ ଡୁଙ୍ଗୁରିପାଲି ଗ୍ରାମରୁ ୧ ବୋଲି ଜଣାପଡିଛି । ସେହିପରି ଆଜି ହରଭଙ୍ଗା ବ୍ଲକ୍ ତିଲେଶ୍ୱର ଗ୍ରାମ ପଞ୍ଚାୟତ କୃଷ୍ଣପାଲି ଗ୍ରାମର ଜଣେ କରୋନା ଆକ୍ରାନ୍ତ ଆଜି ସକାଳେ ବୌଦ୍ଧ କୋଭିଡ ହସପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ବରଣ କରିଛନ୍ତି । ତାଙ୍କର ବୟସ ୫୯ ବର୍ଷ ଓ ସେ ଗତ ୧ ତାରିଖରୁ କରୋନା ପଜିଟିଭ ଚିହ୍ନଟ ହୋଇ ଚିକିତ୍ସାଧୀନ ଅବସ୍ଥାରେ ଥିଲେ । ସେ ପୁରୁଣା କଟକ ମା ଭୈରବୀ ମହାବିଦ୍ୟାଳୟରେ କିରାଣୀ ଭାବରେ କାର୍ଯ୍ୟ କରୁଥିଲେ । ସରକାରୀ ଭାବେ ତାଙ୍କ ମୃତ୍ୟୁକୁ ପୁଷ୍ଟି କରାଯାଇନାହିଁ ।
