ବୌଦ୍ଧ/ବାଉଁଶୁଣୀ,୬/୧ – ବୌଦ୍ଧବ୍ଲକ୍ ବାଉଁଶୁଣୀ ଛକରେ ନିୟମିତ ବ୍ୟବଧାନରେ ବିଭିନ୍ନ ଦୋକାନରୁ ଚୋରୀହୋଇ ଚାଲିଛି । ବାରମ୍ବାର ଚୋରୀ ହେଉଥିଲେ ମଧ୍ୟ ଚୋରମାନଙ୍କୁ ଧରିବାରେ ପୋଲିସ୍ ସମ୍ପୂର୍ଣ୍ଣ ବିଫଳ ହେଉଥିବାରୁ ସାଧାରଣ ଲୋକେ ଆତଙ୍କିତ ଅବସ୍ଥାରେ କାଳାତିପାତ କରୁଛନ୍ତି । ବାଉଁଶୁଣୀ ଛକ ଏକ ପ୍ରମୁଖ ବ୍ୟବସାୟିକ ପେଣ୍ଠସ୍ଥଳୀ ହୋଇଥିଲେ ମଧ୍ୟ ପୋଲିସ୍ ପେଟ୍ରୋଲିଂ ବ୍ୟବସ୍ଥା ଅତି ଢିଲା ହେଉଥିବା ଅଭିଯୋଗ ହୁଏ । ଗତରାତିରେ ବାଉଁଶୁଣୀ ଛକ ନିକଟ ଗୁନ୍ଦୁଲିଆ ରାସ୍ତାରେ ଥିବା ବିଶିକେଶନ ପ୍ରଧାନଙ୍କ ବର୍ଷା ମୋବାଇଲ ଦୋକାନରୁ ଚୋରୀ ହୋଇଥିବା ବାଉଁଶୁଣି ଥାନାରେ ଅଭିଯୋଗ ହୋଇଛି । ଦୋକାନ ମାଲିକଙ୍କ କହିବା ଅନୁଯାୟୀ କବାଟ ତାଲା ଭାଙ୍ଗି ଗତ ରାତିରେ କେହି ଦୁର୍ବୃତ୍ତ ପ୍ରାୟ ୫ ଗୋଟି ଆଣ୍ଡ୍ରଏଡ, ୨୫ ଗୋଟି କି ପେଡ ଓ ମରାମତି ପାଇଁ ଦୋକାନରେ ଥିବା କିଛି ଗ୍ରାହକଙ୍କ ମୋବାଇଲ ଚୋରୀ ହୋଇଛି । ଏ ସମ୍ପର୍କରେ ଦୋକାନ ମାଲିକଙ୍କ ତରଫରୁ ଥାନାରେ ଅଭିଯୋଗ କରାଯାଇଥିବାବେଳେ ପୋଲିସ୍ ତଦନ୍ତକଲେ ସବିଶେଷ ତଥ୍ୟ ମିଳିବ ବୋଲି ଆଶା କରାଯାଉଛି । ବାଉଁଶୁଣୀ ଛକ ଓ ବଜାର ଅଞ୍ଚଳରେ ରାତି ପୋଲିସ ପେଟ୍ରୋଲିଂ ବ୍ୟବସ୍ଥା କଡାକଡି କରାଯିବାକୁ ବ୍ୟବସାୟୀ ମହଲରେ ଦାବୀ ହେଉଛି ।
