ବୌଦ୍ଧ,୨୦/୧ – ଆଜି ସକାଳ ପ୍ରାୟ ୯ଘଣ୍ଟା ସମୟରେ ବାଉଁଶୁଣୀ ଥାନା ସାହାଜପାଲ୍ ଛକ ନିକଟରେ ଥିବା ପ୍ରଜିତା ଜ୍ୱେଲର୍ସ ସାମ୍ନାରୁ ଗହଣା ଭର୍ତ୍ତି ବ୍ୟାଗ୍ ଲୁଟ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଜ୍ୱେଲର୍ସ ମାଲିକ ପ୍ରଦୀପ ପୃଷ୍ଟିଙ୍କ ପୁଅ ଦୀପକ କୁମାର ପୃଷ୍ଟି ଦୋକାନ ଖୋଲିବା ପାଇଁ ସକାଳ ୯ ଘଣ୍ଟା ସମୟରେ ଯାଇଥିଲେ । ସର୍ଟର ଖୋଲିବାବେଳେ ସର୍ଟରରେ କିଛି ମଇଳା ଲାଗିଥିଲା । ତାକୁ ସଫା କରିବା ପାଇଁ ପଡୋଶୀ ଘରକୁ ପାଣି ଆଣିବାକୁ ଯାଇ ବ୍ୟାଗକୁ ଦୋକାନ ଆଗରେ ରଖି ଯାଇଥିଲେ । ଫେରିବା ପରେ ଦେଖିଲେ ବ୍ୟାଗ୍ ନାହିଁ । ନିକଟରେ ଥିବା ଆଉ ଏକ ଦୋକାନର ସିସି ଟିଭି ଫୁଟେଜରୁ ଜଣେ ଦୁର୍ବୃତ୍ତ ବ୍ୟାଗ୍ ଧରି ଦଉଡି ପଳାଉଥିବା ଦେଖିବାକୁ ମିଳିଥିଲା । ଏ ସମ୍ପର୍କରେ ପ୍ରଦୀପ ପୃଷ୍ଟି ଆଜି ବାଉଁଶୁଣୀ ଥାନାରେ ଲିଖିତ ଅଭିଯୋଗ କରିଛନ୍ତି । ଲୁଟ ସୁନାର ପରିମାଣ ପ୍ରାୟ ୯୦ ଗ୍ରାମ୍ ବୋଲି ଜଣାପଡିଛି । ବାଉଁଶୁଣୀ ଥାନା ପୋଲିସ ତଦନ୍ତ କରୁଛି ।
