ବୌଦ୍ଧ,୧୭/୧୨– ବୌଦ୍ଧବ୍ଲକ ମନମୁଣ୍ଡା ଥାନା ଶଗଡା ଫାଣ୍ଡି ଅନ୍ତର୍ଗତ ବରଗୋଛା ଗ୍ରାମ ପଞ୍ଚାୟତ ମାଝୀପଡା ଗ୍ରାମରେ ଏକ ଜଘନ୍ୟ ହତ୍ୟାକାଣ୍ଡ ଘଟିଥିବା ଜଣାପଡିଛି । ଘରୋଇ କଳହ କାରଣରୁ ନିଜର ସ୍ତ୍ରୀକୁ ଟାଙ୍ଗିଆରେ ହାଣି ସ୍ୱାମୀ ହତ୍ୟା କରିଥିବା ସନ୍ଦେହ କରାଯାଉଛି । ମିଳିଥିବା ସୂଚନା ଅନୁଯାୟୀ ମନମୁଣ୍ଡା ଥାନା ବରଗୋଛା ଗ୍ରାମ ପଞ୍ଚାୟତ ମାଝିପଡା ଗ୍ରାମର ଅଶୋକ ମାଝୀ ତାଙ୍କର ଧର୍ମପତ୍ନୀ ହସ୍ତିନୀ ମାଝୀ (୩୮) ଙ୍କୁ ଟାଙ୍ଗିଆରେ ହାଣି ହତ୍ୟା କରିଥିବା ହସ୍ତିନୀର ବଡ ଭାଇ ବୈକୁଣ୍ଠ ମାଝୀ ମନମୁଣ୍ଡା ଥାନାରେ ଅଭିଯୋଗ କରିଛନ୍ତି । ମୃତ ମହିଳାଙ୍କ ବାପଘର ବଲାଙ୍ଗୀର ଜିଲ୍ଲା ସଇଁତଳା ଥାନା ଅନ୍ତର୍ଗତ ଖାରି ବାହାଲ୍ ଗ୍ରାମ ବୋଲି ଜଣାପଡିଛି । ମନମୁଣ୍ଡା ଥାନା ଆଇଆଇସି ଗୋପିନାଥ ପ୍ରଧାନ ଓ ଶଗଡା ଫାଣ୍ଡି ଅଧିକାରୀ ଅରୁଣ ସିଂ ମାମଲାର ତଦନ୍ତ କରୁଛନ୍ତି ।
