ବୌଦ୍ଧ,୪/୧୦:- ପୁରୁଣାକଟକ ଥାନା ଲୁଣିବାହାଲ ଗ୍ରାମ ପଂଚାୟତ କଣ୍ଟିଆପଦର ଗ୍ରାମର ନେପାଳ ପ୍ରଧାନଙ୍କ ପୁଅ ଜଗଦୀଶ ପ୍ରଧାନ (୨୨) ଗତ ୨ ତାରିଖରୁ ନିଖୋଜ ଥିବା ପରିବାର ପକ୍ଷରୁ ପୁରୁଣାକଟକ ଥାନାରେ ଅଭିଯୋଗ ହୋଇଛି । ମିଳିଥିବା ସୂଚନା ଅନୁଯାୟୀ ଘରୁ ନିଜ ସାଇକେଲ ଧରି ଗତ ୨ ତାରିଖ ଦିନ ସକାଳ ଘ ୮. ୩୦ ମିନିଟ ସମୟରେ ଜଗଦୀଶ ବାହାରିଥିଲେ । ରାତି ପର୍ଯ୍ୟନ୍ତ ଘରକୁ ନ ଫେରିବାରୁ ପରିବାର ଲୋକ ଖୋଜାଖୋଜି କରି ତାଙ୍କୁ ପାଇନଥିଲେ । ପରେ ଶୁଣିବାକୁ ପାଇଥିଲେ ପୁରୁଣାକଟକ ଗ୍ରାମ ପଂଚାୟତ କମଳପୁରଗ୍ରାମ ନିକଟରେ ଗୋଟିଏ ସାଇକେଲ ଦୁଇ ଦିନ ହେଲା ରହିଛି ।
ପରିବାର ଲୋକେ ସାଇକେଲ ଦେଖି ଜଗଦୀଶର ବୋଲି ଚିହ୍ନଟ କରିଛନ୍ତି । ସାଇକେଲ ନିକଟରେ ଜଗଦୀଶ ପିନ୍ଧିଥିବା ଚପଲ ହଳକ ମଧ୍ୟ ପଡିଥିବାର ଦେଖିବାକୁ ମିଳିଛି । ପୋଲିସ ଏ ଘଟଣାର ତଦନ୍ତ କଲେ ଜଗଦୀଶ ନିଖୋଜ ଘଟଣାର ପର୍ଦ୍ଦାଫାସ ହୋଇପାରିବ ବୋଲି ଜନସାଧାରଣରେ ଆଲୋଚନା ହେଉଛି ।
