ବୌଦ୍ଧ/ବାଉଁଶୁଣି,୮/୧୦ – ବୌଦ୍ଧବ୍ଲକ୍ ଗୋଛାପଡା ଗ୍ରାମ ପଂଚାୟତର ଅଁଳାଝୁଲି ଓ ମଲିକପଡା ଗ୍ରାମକୁ ସଂଯୋଗ କରୁଥିବା ରାସ୍ତାର ଦୂରାବସ୍ଥା ସବୁବେଳେ ଚର୍ଚ୍ଚାରେ । ଚର୍ଚ୍ଚାର କାରଣ ହେଲା ଗୋଛାପଡା ଗ୍ରାମ ପଂଚାୟତର ସମିତିସଭ୍ୟା ବୌଦ୍ଧ ପଂଚାୟତ ସମିତିର ଅଧ୍ୟକ୍ଷା ଓ ଉକ୍ତ ପଞ୍ଚାୟତର ବାସିନ୍ଦା ତଥା ୪ ନମ୍ବର ଜିଲ୍ଲା ପରିଷଦ ସଦସ୍ୟା ବୌଦ୍ଧଜିଲ୍ଲା ପରିଷଦର ସଭାପତି ପଦ ଅଳଙ୍କୃତ କରିଛନ୍ତି । ମାତ୍ର ଦୁଃଖର କଥା ଗୋଛାପଡା ଗ୍ରାମ ପଂଚାୟତ ଦୀପ ତଳ ଅନ୍ଧାର ପରି ବିକାଶଠାରୁ ଯୋଜନ ଯୋଜନ ଦୂରକୁ ଚାଲିଯାଉଥିବା ଅଭିଯୋଗ ହେଉଛି । ଖାଲି ଅଁଳାଝୁଲି କିମ୍ବା ମଲ୍ଲିକପଡା କି କରଡାପଡା ନୁହେଁ ବରଂ ପଞ୍ଚାୟତର କୌଣସି ଗ୍ରାମକୁ ଯୋଗାଯୋଗ ସୁଗମ ନୁହେଁ । ଟିକିଏ ବର୍ଷା ହେଲେ ଗ୍ରାମ ଗୁଡିକ ବାହ୍ୟ ଜଗତରୁ ଏକ ପ୍ରକାର ବିଚ୍ଛିନ୍ନ ହୋଇଯାଉଥିବା ଦେଖିବାକୁ ମିଳେ । ଏ ଦିଗରେ ଦୃଷ୍ଟିଦେବାକୁ ଗ୍ରାମବାସୀ ବାରମ୍ବାର ଅଭିଯୋଗ କରୁଥିଲେ ମଧ୍ୟ କାହାରି ଶୁଭ ଦୃଷ୍ଟି ପଡୁନଥିବା ପଂଚାୟତବାସୀ ପ୍ରକାଶ କରିଛନ୍ତି । ଜିଲ୍ଲାପାଳ ଏ ଦିଗରେ ପଦକ୍ଷେପ ନେବାକୁ ଜନସାଧାରଣରେ ଦାବି ହେଉଛି ।
