ବୌଦ୍ଧ, ୧୦/୮- ଆଜି ବୌଦ୍ଧସହରରେ ଏକ ଦୁଃଖଦ ଘଟଣା ଘଟିଯାଇଛି । ଦିନ ପ୍ରାୟ ସାଢେ ୨ଟା ସମୟରେ ଏକ ଟ୍ରକ ଧକ୍କାରେ ବୌଦ୍ଧସହରର ମୁସଲିମପଡାର ଅବଦୁଲ ମଇମ ଖାଁ (୨୫)ଙ୍କର ମୃତ୍ୟୁ ଘଟିଥିବା ଜଣାପଡିଛି । ପ୍ରାପ୍ତ ଖବରରୁ ପ୍ରକାଶ ଯେ ଅବଦୁଲ ବୌଦ୍ଧ ବସଷ୍ଟାଣ୍ଡରୁ ବାଇକରେ ନିଜଘରକୁ ଯାଉଥିବାବେଳେ ଏନଏସିଛକପଟୁ ଦ୍ରୁତଗତିରେ ଆସୁଥିବା ଏକ ଟ୍ରକ ଶନିମନ୍ଦିର ନିକଟରେ ଅବଦୁଲଙ୍କ ବାଇକକୁ ପଛପଟୁ ଧକ୍କା ଦେଇଥିଲା । ଅବଦୁଲ ବାଇକରୁ ଛିଟିକି ପଡିଯିବାପରେ ଟ୍ରକର ପଛଚକ ତାଙ୍କ ମୁଣ୍ଡ ଉପରେ ଚଢିଯାଇଥିଲା ।
ଘଟଣା ସ୍ଥଳରେ ହିଁ ଅବଦୁଲଙ୍କ ପ୍ରାଣବାୟୁ ଉଡିଯାଇଥିଲା । ସ୍ଥାନୀୟ ଲୋକେ ଟ୍ରକକୁ ପିଛା କରିଥିବାବେଳେ ଟ୍ରକ (ନଂ ଓଡି୧୯କେ୧୧୭୮)ଟି କିଆକଟା ଥାନାରେ ଆତ୍ମସମର୍ପଣ କରିଥିଲା । ଟ୍ରକଟି ଅନଗୁଳର ବୋଲି ଜଣାପଡିଥିବାବେଳେ ଟ୍ରକ ଓ ଡ୍ରାଇଭରକୁ ଅଟକ ରଖାଯାଇଛି । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତ ଶବକୁ ଉଦ୍ଧାରକରି ପୋଷ୍ଟମର୍ଟମ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲା । ଏହି ଦୁର୍ଘଟଣା ଖବର ଚାରିଆଡେ ପ୍ରଚାର ହେବାପରେ ମୁସଲିମପଡା, ସାଙ୍ଗସାଥୀ ମହଲରେ ଏବଂ ସହରରେ ଶୋକର ଛାୟା ଖେଳିଯାଇଛି ।
