ବୌଦ୍ଧ,୬/୮ – ଆଜି ବୌଦ୍ଧ ଜିଲ୍ଲାରେ ୮ ଜଣ କରୋନା ପଜିଟିଭ ଚିହ୍ନଟ ହୋଇଥିବା ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ସୂଚନା ମିଳିଛି । ପୁର୍ବରୁ ବୌଦ୍ଧ ଜିଲ୍ଲାରେ ୧୫୪ ଜଣ ପଜିଟିଭ ବାହାରିଥିବା ବେଳେ ଆଜିର ପଜିଟିଭକୁ ମିଶାଇ ଜିଲ୍ଲାରେ କରୋନା ଆକ୍ରାନ୍ତ ସଂଖ୍ୟା ୧୬୨ ରେ ପହଞ୍ଚିଲା । ଆଜି ବୌଦ୍ଧ ବ୍ଲକ୍ ଲକ୍ଷ୍ମୀପ୍ରସାଦ ଗ୍ରାମ ପଂଚାୟତ ଅନ୍ତର୍ଗତ ନାରୟଣ ନଗର ଗ୍ରାମରୁ ୫ ଜଣ କରୋନା ପଜିଟିଭ ଚିହ୍ନଟ ହୋଇଥିବା ଜଣାପଡିଛି । ଗତ ସୋମବାର ଦିନ ସୋନପୁର ପଟାଭାଡି ଅଂଚଳରୁ ଯେଉଁ ଦମ୍ପତ୍ତି କରୋନା ପଜିଟିଭ ଚିହ୍ନଟ ହୋଇଛନ୍ତି ଏ ସମସ୍ତେ ତାଂକରି ସଂସ୍ପର୍ଶରେ ଆସିଥିବା କୁହାଯାଉଛି । ପଟାଭାଡିରୁ ଚିହ୍ନଟ ହୋଇଥିବା ଦମ୍ପତ୍ତି ଗୋଟିଏ ବାର୍ଷିକ ଶ୍ରାଦ୍ଧ ଦିବସକୁ ଆସି ନାରାୟଣ ନଗର ଗ୍ରାମରେ ୫ଦିନ ରହି ସମସ୍ତଙ୍କ ସହ ମିଶି ଭୋଜି ଖାଇଥିଲେ । ନାରୟଣ ନଗର ଗ୍ରାମରୁ ପଜିଟିଭ ଚିହ୍ନଟ ୫ ଜଣଙ୍କ ମଧ୍ୟରୁ ଦୁଇ ଜଣ ନାବାଳକ ଓ ନାବାଳିକା ମଧ୍ୟ ଅଛନ୍ତି । ସେହିପରି ଆଜି ବଉଦ ସହର ବୁଟୁପାଲି ଓ ବୀରନରସିଂହପୁର ନିକଟ ନୂଆପଡା ଗ୍ରାମରୁ ଜଣେ ଲେଖାଏଁ ଚିହ୍ନଟ ହୋଇଥିବା ସିଡିଏମଓ ଡାକ୍ତର ତ୍ରିଲୋଚନ ପ୍ରଧାନ ପ୍ରକାଶ କରିଛନ୍ତି । ବୌଦ୍ଧ ତାଲିକାରେ ଆଜି ଚିହ୍ନଟ ହୋଇଥିବା ୮ ନମ୍ବର୍ ପଜିଟିଭ ସମ୍ବଲପୁର ଜିଲ୍ଲା ରେଢାଖୋଲ ଅଂଚଳର ଜଣେ ବାଳିକା ଓ ସେ ବୌଦ୍ଧ ଆସି ପରୀକ୍ଷା କରାଇଥିଲେ ବୋଲି ସିଡିଏମଓ ଡାକ୍ତର ପ୍ରଧାନ କହିଛନ୍ତି ।
