କଣ୍ଟାମାଳ,୨୭/୫- ଏକ ପ୍ରେସ ଲେଖା ଗାଡିରେ ଖୁବ ଚତୁରତାର ସହିତ ଗଞ୍ଜେଇ ଚାଲାଣ କରୁଥିବା ଏକ ଲାଲ ରଙ୍ଗର ଟାକ୍ସି ନଂ ଓଆର ୦୨ ଏ-୨୬୪୩ ଗାଡିକୁ ଗତକାଲି ରାତିରେ କଣ୍ଟାମାଳ ପୋଲିସ ଜବତ କରିଥିବା ଜଣାଯାଇଛି । ଗାଡିରେ ପ୍ରେସ ସହିତ ଦୂରଦର୍ଶନ ଓଡିଆ ଲେଖାଯାଇଥିବା ଏହି ଗାଡିକୁ କଣ୍ଟାମାଳ ପୋଲିସ ସନ୍ଦେହରେ ଭାରତୀୟ ଷ୍ଟେଟ ବ୍ୟାଙ୍କ ନିକଟରେ ଅଟକାଇବାରୁ ଗାଡିରୁ ୨୦ ପ୍ୟାକେଟ ଗଞ୍ଜେଇ ବାହାରିଥିଲା । ଗାଡି ସହ ଡ୍ରାଇଭରକୁ ପୋଲିସ ଥାନାକୁ ନେଇ ପଚରାଉଚୁରା କରି ନିଜ ହେପାଜତରେ ରଖିଥିଲେ ହେଁ ସମ୍ବାଦ ଲେଖା ପର୍ଯ୍ୟନ୍ତ ଏ ନେଇ ପୋଲିସ କୌଣସି ମାମଲା ଋଜ୍ଜୁ କରିନଥିବା ବେଳେ ଏ ସଂପର୍କରେ ଗଣମାଧ୍ୟମକୁ ସୁଦ୍ଧା କୌଣସି ସୂଚନା ଦେଉନଥିବା ଜଣାଯାଇଛି । ଘଟଣାକୁ ନେଇ ସ୍ଥାନୀୟ ଥାନା ଅଧିକାରୀଙ୍କ ସହ ଯୋଗାଯୋଗ କରାଯାଇଥିଲେ ହେଁ ଫୋନ ଉଠାଉନଥିବା ହେତୁ ସବିଶେଷ ତଥ୍ୟ ମିଳିପାରିନଥିବା ବେଳେ କଣ୍ଟାମାଳ ପୋଲିସର ନିରବତାକୁ ନେଇ ବୌଦ୍ଧ ଆରକ୍ଷୀ ଅଧିକ୍ଷକଙ୍କ ସହିତ ଯୋଗାଯୋଗ କରିବାରୁ ଗାଡି ସହ ଡ୍ରାଇଭରକୁ ଧରାଯାଇଛି ଏବଂ ୧ କେଜି ଓଜନର ୨୦ଟି ପ୍ୟାକେଟ । ଗାଡିରୁ ମିଳିଛି ବୋଲି କହିଥିଲେ । ପୋଲିସ ଧରିଥିବା ଗାଡିର ଡ୍ରାଇଭର ଜଣକ କୁଆଡେ ଥାନାରୁ ଫେରାର ମାରିଥିବା ନେଇ ସାଧାରଣରେ ଚର୍ଚ୍ଚା ଜୋର ଧରିଥିବା ବେଳେ ଆସାମୀକୁ ଖୋଜିବାକୁ ପୋଲିସ ଛାନଭିନ ଚଳାଇ ଥିବାରୁ ଏଯାବତ ଗଣମାଧ୍ୟମକୁ ସୂଚନା ଦେବାରେ ପୋଲିସ ଜାଣିଶୁଣି ଅବହେଳା କରୁଥିବା କୁହାଯାଉଛି ।
