ଦାରିଙ୍ଗବାଡ଼ି୧୮/୪: ଦାରିଙ୍ଗବାଡ଼ି ଥାନା ଅନ୍ତର୍ଗତ ୫୯ନମ୍ବର ଜାତୀୟ ରାଜପଥର ଡବେରୀ ବୁଲାଣିରେ ଆଜି ସକାଳ ସାଢେ୭ଟା ସମୟରେ ଏକ ମର୍ମନ୍ତୁଦ ବାଇକ ଦୁର୍ଘଟଣା ଘଟିଥିଲା । ଫଳରେ ଘଟଣା ସ୍ଥଳରେ ଜଣଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ୨ ଜଣ ଗୁରୁତର ଭାବେ ଆହତ ହୋଇଥିବା ଜଣାପଡ଼ିଛି । ମୃତକ ଜଣକ ହେଲେ ବି.ଡକେବାଡି ଗ୍ରାମର ଆମ୍ବେଦକର ମଳିକ(୧୬) ଅନ୍ୟ ଗୁରୁତର ୨ ଜଣ ଯୁବକ ହେଲେ ଜୁଦେନ ମଳିକ(୧୮) ଓ ପ୍ରଶାନ୍ତ ପ୍ରଧାନ(୧୭) । ସୂଚନା ମୁତାବକ ଏହି ତିନିଜଣ ଆଜି ସକାଳୁ ଏକ ବାଇକ ନମ୍ବର (ଓ-ଡି-୧୨-ଡି-୦୧୯୫) ଯୋଗେ କୌଣସି ଏକ କାମରେ ବାଲାପାଙ୍ଗା ଗ୍ରାମକୁ ଯାଇଥିବାବେଳେ ଦାରିଙ୍ଗବାଡି ଫେରୁଥିବା ସମୟରେ ଡ଼ବେରୀ ନିକଟରେ ଥିବା ବୁଲାଣିରେ ବାଇକ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା । ଦୁର୍ଘଟଣା ହେବା ପରେ ଦାରିଙ୍ଗବାଡି ଅଗ୍ନିଶମ ବିଭାଗ ଖବରପାଇ ଘଟଣା ସ୍ଥଳରେ ପହଞ୍ଚି ତିନି ଜଣଙ୍କୁ ଉଦ୍ଧାରକରି ଦାରିଙ୍ଗବାଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଥିମଧ୍ୟରୁ ଘଟଣା ସ୍ଥଳରେ ହିଁ ଆମ୍ବେଦକରଙ୍କର ମୃତ୍ୟୁ ହୋଇସାରିଥିଲା ବେଳେ ଡାକ୍ତରଖାନାରେ ଆମ୍ବେଦକରଙ୍କୁ ଡାକ୍ତର ମୃତ ଘୋଷଣା କରିଥିଲେ । ଅନ୍ୟ ପକ୍ଷରେ ଜୁଦେନ ଓ ପ୍ରଶାନ୍ତ ଗୁରୁତର ଆହତ ହୋଇଥିଲେ । ଦୁର୍ଘଟଣା ଖବର ପାଇ ଦାରିଙ୍ଗବାଡି ଥାନାର ଏସଆଇ ସୌମ୍ୟରଞ୍ଜନ ଜେନା ମେଡିକାଲରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ଦେଖିବାକୁ ମିଳିଛି ।
