ଦଶପଲ୍ଲା,୯/୮- ଆଜି ପୂର୍ବାହ୍ନ ୧୦ ଘଟିକା ସମୟରେ ନୟାଗଡ ଜିଲ୍ଲା ଦଶପଲ୍ଲା ବ୍ଲକ୍ ୫୭ ନମ୍ୱର୍ ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥର ରଙ୍ଗମାଟିଆ ଠାରେ ୨ ଟି କାର୍ ମୁହାଁମୁହିଁ ଧକ୍କାହେବା ଫଳରେ ୪ ଜଣ ଗୁରୁତର ଆହତ ହୋଇଛନ୍ତି । ଆହତ ୪ ଜଣଙ୍କୁ ସ୍ଥାନୀୟ ଲୋକ ଉଦ୍ଧାର କରି ଦଶପଲ୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଆହତଙ୍କ ମଧ୍ୟରେ ବୌଦ୍ଧର ଅତିରିକ୍ତ ଜିଲ୍ଲାପାଳ ଏନ.ସି. ଜ୍ୟୋତି ରଞ୍ଜନ ନାଏକ ରହିଛନ୍ତି । ପ୍ରାପ୍ତ ସୂଚନା ଅନୁଯାୟୀ ବୌଦ୍ଧଜିଲ୍ଲା ଏଡିଏମ ଶ୍ରୀ ନାଏକ ଏକ କାର (ଟ୍ୟାକ୍ସି) ନମ୍ବର ଓଡି୦୨ବିଜି୬୦୨୨ ଯୋଗେ ଦଶପଲ୍ଲା ପାର୍ଶ୍ୱରୁ ବୌଦ୍ଧ ଅଭିମୁଖେ ଆସୁଥିବା ବେଳେ ଫୁଲବାଣୀ ପଟୁ ଆସୁଥିବା ଏସ କେ ଦିଗାଲଙ୍କ ବ୍ୟକ୍ତିଗତ କାର ନମ୍ୱର୍ ଓଡି୦୭ଏଜେ୨୦୮୨ ସହିତ ସାମ୍ନାସାମ୍ନି ଧକ୍କାହେବା ଫଳରେ ଅତିରିକ୍ତ ଜିଲ୍ଲାପାଳ ଶ୍ରୀ ନାଏକଙ୍କ ଗୋଡ଼ରେ ଶକ୍ତ ଆଘାତ ଲାଗିବା ସହିତ ମୁଣ୍ଡ ମଧ୍ୟ ଫାଟିଯାଇଥିଲା । ଶ୍ରୀ ନାଏକଙ୍କ ଡ୍ରାଇଭର ମଧ୍ୟ ଗୁରୁତର ଭାବେ ଆହତ ହେଇଥିବା ଜଣାପଡିଛି । । ଏଥିସହିତ ଏସକେ ଦିଗାଲଙ୍କ ପରିବାରର ୨ ଜଣ ମଧ୍ୟ ଗୁରୁତର ଆହତ ହୋଇଛନ୍ତି । ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ଗାଡ଼ି ୨ଟି ତୀବ୍ର ବେଗରେ ଆସୁଥିବା ହେତୁ ପରସ୍ପରକୁ ଜୋର୍ରେ ଧକ୍କା ଦେଇଥିଲା । ଅତିରିକ୍ତ ଜିଲ୍ଲାପାଳ ଶ୍ରୀ ନାୟକଙ୍କୁ ପ୍ରାଥମିକ ଚିକିତ୍ସା ପରେ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିବା ଜଣାପଡିଛି ।
