ଦଶପଲ୍ଲା,୨୬/୬ :- ଚାଲିଗଲେ ଲାଲା ସାର୍ । ଦଶପଲ୍ଲା ପଶ୍ଚିମାଞ୍ଚଳର ବିଶିଷ୍ଟ ନାଟ୍ୟ ନିର୍ଦ୍ଦେଶକ ତଥା ସ୍ୱନାମଧନ୍ୟ କଳାକାର ଦୀପକ କୁମାର ଷଡ଼ଙ୍ଗୀ ( ଲାଲା ସାର୍ ) ଙ୍କ ୪୦ ବର୍ଷ ବୟସରେ ଦେହାନ୍ତ ହୋଇଯାଇଛି । ଆଜି ରାତି ୨ ଘଟିକା ସମୟରେ ସେ ଅସୁସ୍ଥ ଅନୁଭବ କରିବାରୁ ତାଙ୍କୁ ସଙ୍ଗେସଙ୍ଗେ ୧୦୮ ଆମ୍ବୁଲାନ୍ସ ଯୋଗେ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଶୋକାକୁଳ ପରିବେଶରେ ତାଙ୍କ ମୃତ ଶରୀରକୁ କୋଭିଡ୍ ନିୟମ ଅନୁସାରେ ଶୋଭାଯାତ୍ରାରେ ଶ୍ମଶାନକୁ ନିଆଯାଇ ଦାହ ସଂସ୍କାର କରାଯାଇଥିଲା । ତାଙ୍କର ଏକମାତ୍ର ପୁତ୍ର ରୁଦ୍ର ପ୍ରସାଦ ( ୦୯ ବର୍ଷ ) ମୁଖାଗ୍ନି ଦେଇଥିଲେ । ପ୍ରକାଶ ଥାଉକି ଲାଲା ସାର୍ ନୟାଗଡ଼, ବୌଦ୍ଧ, କନ୍ଧମାଳ ଓ ଗଞ୍ଜାମ ଜିଲ୍ଲାର ଅନେକ ଗ୍ରାମାଞ୍ଚଳରେ ଶତାଧିକ ନାଟକରେ ନିର୍ଦ୍ଦେଶନା ଦେଇ ଜଣେ ସଫଳ ନିର୍ଦ୍ଦେଶକ ଭାବରେ ସୁ ପରିଚିତ ହୋଇପାରିଥିଲେ । ତାଙ୍କର ନିଖୁଣ ଅଭିନୟ ଦର୍ଶକ ମାନଙ୍କୁ ମନ୍ତ୍ରମୁଗ୍ଧ କରିଦେଉଥିବା କହିଛନ୍ତି କିଛି ଯାତ୍ରାପ୍ରେମୀ । ଲାଲା ସାର୍ ଘରର ଏକମାତ୍ର ରୋଜଗାରକ୍ଷମ ବ୍ୟକ୍ତି ହୋଇଥିଲାବେଳେ ତାଙ୍କ ବିୟୋଗରେ ତାଙ୍କ ଘରର ଆର୍ଥିକ ମେରୁଦଣ୍ଡ ଭାଙ୍ଗି ପଡିଛି । ତେଣୁ ସରକାରଙ୍କ ତରଫରୁ ତାଙ୍କ ପରିବାରକୁ ଆର୍ଥିକ ସାହାଯ୍ୟ ପ୍ରଦାନ କରିବାକୁ ସର୍ବସାଧାରଣରେ ଦାବି ହେଉଛି ।
