ପାଟଣାଗଡ଼,୨୯/୬- ଓଡ଼ିଶା କେନ୍ଦୁପତ୍ର କର୍ମଚାରୀ ସଂଘ ପକ୍ଷରୁ ରାଜ୍ୟ ଉପସଭାପତି ତଥା ବରିଷ୍ଠ ଟାଣୁଆ ସଂଗ୍ରାମୀ ନେତା ସ୍ୱର୍ଗତ କିଶୋର ପରିଚ୍ଛାଙ୍କ ବିୟୋଗରେ ଶ୍ରଦ୍ଧାଞ୍ଜଳି ସଭା ପାଢେଲସ୍ଥିତ ପରିଚ୍ଛା ହେଚେରି କ୍ୟାଂପସ ପରିସରରେ ଅନୁଷ୍ଠିତ ହୋଇଯାଇଛି । ଚିତ୍ରସେନ ବଗର୍ତ୍ତି ଙ୍କ ସଭାପତିତ୍ୱରେ ଅନୁଷ୍ଠିତ ଶୋକସଭାରେ ବରଗଡ଼ ଜିଲ୍ଲା ପଦ୍ମପୁର ପୂର୍ବତନ ବିଧାୟକ ତଥା ପଦ୍ମପୁର ଡିଭିଜନ ସଂପାଦକ ପ୍ରଦୀପ କୁମାର ପୁରୋହିତ ମୁଖ୍ୟଅତିଥି ,ଖରିଆର ଡିଭିଜନ ସଂପାଦକ ଯଦୁମଣି ପାଣିଗ୍ରାହୀ ମୁଖ୍ୟବକ୍ତା ଭାବେ ଯୋଗଦେଇ ସ୍ୱର୍ଗତ ପରିଚ୍ଛାଙ୍କର ବଳିଷ୍ଠ ନେତୃତ୍ୱ ଗରିବ ଶ୍ରମିକଙ୍କ ପାଇଁ ତାଙ୍କର ସଂଗ୍ରାମ ଓ ସଂଘ ସହିତ ଜଡିତ ପୁରୁଣା କଥାସବୁ ସ୍ମୃତିଚାରଣ କରିବାସହ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଉକ୍ତ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ଅବସରରେ ଡିଭିଜନର ସମସ୍ତ କର୍ମକର୍ତ୍ତା ସର୍ବ ସମ୍ମତି କ୍ରମେ ସ୍ୱର୍ଗତ ପରିଚ୍ଛାଙ୍କର ବିୟୋଗରେ ତାଙ୍କ ସ୍ଥାନରେ ଡିଭିଜନର ନେତୃତ୍ୱ ନେବାପାଇଁ ତାଙ୍କର ସୁପୁତ୍ର ଶିବାନନ୍ଦ ପରିଚ୍ଛାଙ୍କୁ ପ୍ରସ୍ତାବ ଆଗତ ହୋଇ ସର୍ବସମ୍ମତିକ୍ରମେ ଗୃହୀତ ହୋଇଥିଲା । ଆଜିଠାରୁ ଶିବାନନ୍ଦ ପରିଚ୍ଛା ଦାୟିତ୍ୱ ନେବା ସାଙ୍ଗକୁ ତାଙ୍କ ବାପାଙ୍କ କଥାକୁ ଅନୁସରଣ କରି ଡିଭିଜନର ସମସ୍ତ ଦାୟିତ୍ୱ ଓ କର୍ତ୍ତବ୍ୟ ନିର୍ବାହ କରି ବଳିିଷ୍ଠ ନେତୃତ୍ୱ ପ୍ରଦାନ କରିବେ ବୋଲି ସମସ୍ତେ ଆଶାବ୍ୟକ୍ତ କରିଥିଲେ । ଏହି ସ୍ମୃତି ସଭାରେ ଚିତ୍ତରଞ୍ଜନ ବେହେରା ,ଧ୍ରୃବ ଚାନ୍ଦ ,ମକାରୁ ପଣ୍ଡା , ନୀଳମଣି ବୁଡେକ ,ଶିବ ପଟନାୟକ ,ତିଲ ବାଗ , କାଶୀ ପ୍ରସାଦ ସାହୁ , ଦ୍ରୋଣ ବନଛୋର,ତିର୍ଥ ଜୁଏଡ , ରାଜୀବ ବିଶ୍ୱାଳ ସାମିଲ ହୋଇଥିଲେ । ପାଟଣାଗଡ଼ ଡିଭିଜନ ଓଡ଼ିଶା କେନ୍ଦୁପତ୍ର କର୍ମଚାରୀ ସଂଘ ସମସ୍ତ ରେଞ୍ଜର ଶତାଧିକ କର୍ମକର୍ତ୍ତା ଯୋଗଦେଇଥିବା ବେଳେ ସଂଘ ରାଜ୍ୟ ସଂପାଦକ କୋକିଳ ସାହୁ ସଭାପରିଚାଳନା କରିଥିଲେ ।
