ଭୁବନେଶ୍ୱର: ଲକଡାଉନ ଉଠିବା ପରେ ରୋଲ ନଂ ଅନୁଯାୟୀ ପିଲା ସ୍କୁଲ ଆସିବେ । ଯେଉଁ ପିଲାଙ୍କ ରୋଲ ନଂ ଯୁଗ୍ମ ସେମାନେ ଯୁଗ୍ମ ତାରିଖରେ ଯେଉଁ ମାନଙ୍କର ରୋଲ ନଂ ଅଯୁଗ୍ମ ସେମାନେ ଅଯୁଗ୍ମ ତାରିଖରେ ସ୍କୁଲ ଆସିବେ ବୋଲି ଏନ୍ସିଇଆର୍ଟିର ନିର୍ଦ୍ଦେଶକ ହୃଷିକେଶ ସେନାପତି ସୂଚନା ଦେଇଛନ୍ତି । ସେ କହିଛନ୍ତି ଏ ସଂପର୍କରେ ଖୁବଶୀଘ୍ର ଏକ ଗାଇଡଲାଇନ ହେବ । ଏହି ଗାଇଡଲାଇନକୁ କେନ୍ଦ୍ର ମାନବ ସମ୍ବଳ ବିଭାଗକୁ ପଠାଯିବ । ସେଠାରୁ ଅନୁମତି ମିଳିଲେ ଏହାକୁ ସମଗ୍ର ଦେଶର ବିଦ୍ୟାଳୟଗୁଡିକରେ ଲାଗୁ କରାଯିବ । ସାମାଜିକ ଦୂରତା ରକ୍ଷା କରି ୫୦ ପ୍ରତିଶତ ପିଲାଙ୍କୁ ନେଇ ବିଦ୍ୟାଳୟରେ ପାଠପଢା ଆରମ୍ଭ କରାଯିବ ବୋଲି ସେ ସୂଚନା ଦେଇଛନ୍ତି ।
