ସମ୍ବଲପୁର, ୨୧/୭- ସ୍ଥାନୀୟ ବୀର ସୁରେନ୍ଦ୍ର ସାଏ ମାର୍ଗ ସ୍ଥିତ ପ୍ରିଣ୍ଟ ବଜାର ଗୋଦାମ ଘରେ ଆଜି ପୂର୍ବାହ୍ନ ୧୦ଟା ସମୟରେ ନିଆଁ ଲାଗିଯିବାରୁ ସେ ଅଞ୍ଚଳରେ ହଇଚଇ ସୃଷ୍ଟି ହୋଇଥିଲା । ସେଠାରେ ସଂଲଗ୍ନ ରାସ୍ତାକଡରେ ଦୈନିକ ପନିପରିବା ବଜାର ବସିଥାଏ ଓ ଉକ୍ତ ଭବନର ଉପର ମହଲାରେ ଏକ ବ୍ୟସ୍ତ ହୋଟେଲ ରହିଛି, ଏଣୁ ନିଆଁ ଲାଗି ଧୂଆଁ ବାହାରିବା କ୍ଷଣି ସେଠାରେ ଭିଡ ଜମା ହୋଇଯାଇଥିଲା । ସୌଭାଗ୍ୟକୁ ସେଠାରୁ ଅତି ନିକଟରେ ଅଗ୍ନିଶମ କାର୍ଯ୍ୟାଳୟ ରହିଛି, ଏଣୁ ଖବର ପାଇଲା କ୍ଷଣି ଅଗ୍ନିଶମ ଦଳ ପହଞ୍ଚି କାର୍ଯ୍ୟାନୁଷ୍ଠାନ ଆରମ୍ଭ କରିଥିଲେ । ଉକ୍ତ ଭୂତଳ ଗୋଦାମ ଘରେ ଅଧିକାଂଶ ପ୍ଲାଷ୍ଟିକ ସାମଗ୍ରୀ ରଖାଯାଇଥିଲା, ଏଣୁ ନିଆଁ ଲାଗିବା କ୍ଷଣି ବିଷାକ୍ତ ଧୂଆଁ ବାହାରିବା ଦୃଷ୍ଟିରୁ ଅଗ୍ନିଶମ ଦଳ ଅକ୍ସିଜେନ ସିଲିଣ୍ଡର ଓ ଗ୍ୟାସମାସ୍କ ସହିତ ସେଠାକୁ ପ୍ରବେଶ କଲେ ଓ ତାହାକୁ ନିୟନ୍ତ୍ରଣ କରିଥିଲେ । ଭୂତଳ ଗୋଦାମ ଘରେ ଭରିଯାଇଥିବା ବିଷାକ୍ତ ଗ୍ୟାସ କାଢ଼ିବାପାଇଁ ସେମାନେ ଓସାରିଆ ପାଇପ ବ୍ୟବହାର କରିଥିଲେ । ନିଆଁକୁ ନିୟନ୍ତ୍ରଣ ପାଇଁ ସେଠାରେ ଅଗ୍ନିଶମ ଟେଙ୍କର ବାହନ ପ୍ରସ୍ତୁତ ହୋଇ ରଖାଯାଇଥିଲା କିନ୍ତୁ ବିଦ୍ୟୁତ ସର୍ଟସର୍କିଟ ଦୃଷ୍ଟିରୁ ତାହା ବ୍ୟବହାର କରାଯାଇ ନଥିଲା । ଉକ୍ତ ଅଗ୍ନିକାଣ୍ଡରେ କ୍ଷୟକ୍ଷତିର ଆକଳନ ଜାରି ରହିଥିବାରୁ ସଠିକ ଆକଳନ ହୋଇପାରିନାହିଁ ।
