ସୋନପୁର,୧୦/୧୦-: ସୁବର୍ଣ୍ଣପୁର ଜିଲ୍ଲା ପୁଲିସ ବିଭାଗରେ କାର୍ଯ୍ୟରତ ଏଏସଆଇ ତପନ କୁମାର ମହାନ୍ତି ( ୫୧)ଙ୍କ ଗତକାଲି କଟକର ଏସ୍ ସି ବି ମେଡ଼ିକାଲରେ ଚିକିତ୍ସାଧିନ ଅବସ୍ଥାରେ ପରଲୋକ ହୋଇଯାଇଛି । ଦୀର୍ଘ ଦିନ ଧରି ସେ ଲିଭର ଜନିତ ରୋଗରେ ପୀଡିତ ଥାଇ ନିୟମିତ ଚିକିତ୍ସାରେ ରହିଥିଲେ । କିଛି ଦିନ ତଳେ ସେ ଚିକିତ୍ସା ପାଇଁ କଟକ ବଡ଼ମେଡିକାଲରେ ଭର୍ତ୍ତି ହୋଇଥିଲେ ହେଲେ ଅବସ୍ଥାରେ ସୁଧାର ନ ଆସି ଗତକାଲି ତାଙ୍କର ପରଲୋକ ହୋଇଯାଇଥିଲା । ସେ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ତୁଳସୀ ଦେଇପୁରରେ ଜନ୍ମଗ୍ରହଣ କରିଥିଲେ ହେଁ ତାଙ୍କର ଚାକିରୀ ଜୀବନ ସେ ପଶ୍ଚିମ ଓଡ଼ିଶାରେ ହିଁ କାଟିଥିଲେ । ବିଶେଷକରି ସୁବର୍ଣ୍ଣପୁର ଜିଲ୍ଲା ଗଠନ ପରେ ସେ ଏଇଠି ବିଭିନ୍ନ ଥାନାରେ ରହି ତାଙ୍କର କର୍ତ୍ତବ୍ୟ ତୁଳାଇଥିଲେ । ସେ ଜଣେ କଣ୍ଠଶିଳ୍ପୀ ଭାବରେ ମଧ୍ୟ ଏ ଅଞ୍ଚଳରେ ବେଶ ଜଣାଶୁଣା ଥିଲେ । ତାଙ୍କରି ବିୟୋଗରେ ଜିଲ୍ଲାର ବିଭିନ୍ନ ସାଂସ୍କୃତିକ ସଂଗଠନ କର୍ମକର୍ତ୍ତାମାନେ ଶୋକବ୍ୟକ୍ତ କରିଥିବା ବେଳେ ଜିଲ୍ଲା ପୁଲିସ ବିଭାଗ ପକ୍ଷରୁ ତାଙ୍କର ବିୟୋଗରେ ଗଭୀର ଶୋକ ପ୍ରକାଶ କରାଯାଇ ଏସପି ଦେବୀପ୍ରସାଦ ଦାଶ ଜିଲ୍ଲା ପୁଲିସ କନେଷ୍ଟବଳ ହାବିଲଦାର ସଂଘ ସଭାପତି କୁମୁଦରଞ୍ଚନ ମେହେର ସଂପାଦକ ଦିନେଶ ରଞ୍ଜନ ମିଶ୍ରଙ୍କ ସମେତ ଜିଲ୍ଲା ପୁଲିସର ବରିଷ୍ଠ ଅଧିକାରୀମାନେ ଶୋକ ସନ୍ତପ୍ତ ପରିବାର ପ୍ରତି ଗଭୀର ସମବେଦନା ଜଣାଇଛନ୍ତି । ସ୍ୱର୍ଗତ ମହାନ୍ତିଙ୍କ ପତ୍ନୀଙ୍କ ସହ ତାଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି ।
