ମୁମ୍ବାଇ,୨୨/୩ : ବଳିଉଡ ନାୟିକା ତାପସୀ ପନ୍ନୁଙ୍କୁ ପରଦାରେ ପୂରା ଏକ ଭିନ୍ନ ଚେହେରାରେ ଦେଖିବାକୁ ମିଳିବ । ଭୂମିକା ନୂଆ,ଚେହେରା ବି ସ୍ୱତନ୍ତ୍ର । ହୋଲି ଅବସରରେ ରିଲିଜ ହୋଇଛି ‘ସାବାସ ମିଠୁ’ର ଟିଜର । ଏହା ଭାରତୀୟ ମହିଳା କ୍ରିକେଟ ଦଳର ଅଧିନାୟକ ମିତାଲି ରାଜଙ୍କ ଜୀବନୀ ଉପରେ ଆଧାରିତ ବାୟୋପିକ୍ । ଏଥିରେ ମିତାଲିଙ୍କ ଭୂମିକାରେ ନଜର ଆସିବେ ବଲିଉଡ ନାୟିକା ତାପସୀ ପନ୍ନୁ । ଏହି ଫିଲ୍ମର ଟିଜରକୁ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଅପଲୋଡ କରିଛନ୍ତି ତାପସୀ । ବର୍ତ୍ତମାନ ଭିଡିଓଟି ଖୁବ ଭାଇରାଲ ହେବା ସହ ସମସ୍ତଙ୍କ ମନକୁ ଛୁଇଁଛି । ୫୬ ସେକେଣ୍ଡର ଏହି ଭିଡିଓରେ ତାପସୀ ଡ୍ରେସିଙ୍ଗ ରୁମ ସହ ମିତାଲିଙ୍କ ଜର୍ସିରେ ପଡିଆ ଭିତରେ ଏଣ୍ଟ୍ରି ମାରୁଥିବାର ଦେଖିବାକୁ ମିଳିଛି । ଦର୍ଶକ ତ୍ରିରଙ୍ଗା ପତାକା ସହ ତାଙ୍କର ସ୍ୱାଗତ କରୁଥିବା ଭିଡିଓରେ ଦର୍ଶାଯାଇଛି । ମିତାଲିଙ୍କ ସ୍ଥାନରେ ଥିବା ତାପସୀଙ୍କୁ ଇଣ୍ଟ୍ରୋଡ୍ୟୁସ କରିବା ସହ ତାଙ୍କ ରେକର୍ଡ ବିଷୟରେ ବଖାଣିଛନ୍ତି କମେଣ୍ଟେଟର । ତାପସୀଙ୍କ ବ୍ୟତୀତ ଏହି ସିନେମାରେ ପ୍ରମୁଖ ଭୂମିକାରେ ନଜର ଆସିବେ ଅଭିନେତା ବିଜୟ ରାଜ ।
